Ինչպես ավելի վաղ տեղեկացրել էինք, ԱՄՆ-ը մեկ տարվա ընթացքում կնշանակի ԵԱՀԿ Մինսկի խմբի մշտական համանախագահի: Այս մասին հայտարարել է Եվրոպայի և Եվրասիայի հարցերով ԱՄՆ պետքարտուղարի օգնական Էրիկ Ռուբինը, ով հավելել է, որ ԱՄՆ պետքարտուղար Ջոն Քերին կփորձի համապատասխան նշանակումը կատարել այս տարի:
Ռազմավարական և միջազգային հետազոտությունների կենտրոնի գիտաշխատող, վաշինգտոնաբնակ ռուս քաղաքագետ Սերգեյ Մարկեդոնովը «Առաջին լրատվական»-ի հետ հեռախոսազրույցում անդրադառնալով ԱՄՆ պետքարտուղարի՝ ԵԱՀԿ Մինսկի խմբում մշտական համանախագահ նշանակելու որոշմանը՝ կարծիք հայտնեց, որ դրա պատճառն ամենևին էլ այն չէ, թե ԱՄՆ-ը ավելի շատ է հետաքրքրվում Լեռնային Ղարաբաղի խնդրի խաղաղ կարգավորմամբ, կամ որ այդ հարցն իր համար առավել կարևոր նշանակություն է ստացել:
«Չեմ կարծում, որ դա առաջնային հարց է Միացյալ Նահանգների համար, և որ Լեռնային Ղարաբաղի խնդրի խաղաղ կարգավորումն այնքան է անհանգստացնում ԱՄՆ-ին, որ պետք է նման որոշում կայացներ: Իմ համոզմամբ՝ այսօր Միացյալ Նահանգների համար հետաքրքրական մի շարք այլ հարցեր կան:
Ինչ վերաբերում է Լեռնային Ղարաբաղի հիմնահարցին, ապա այստեղ, կարծում եմ, մադրիդյան սկզբունքների նորացված տարբերակից զատ՝ մոտակա ժամանակահատվածում ոչինչ չի լինի»:
Սերգեյ Մարկեդոնովի գնահատմամբ՝ պետքարտուղարը նման որոշում է կայացրել, որպեսզի իրավիճակին քաջածանոթ մեկին ստիպված չլինի կարճ ժամանակահատվածում փոխարինել մյուսով, և ևս երկար ժամանակահատված պահանջվի՝ մինչև վերջինս ծանոթանա խնդրի մանրամասներին:
«Մեկ կամ երկու տարի տվյալ անձը հետաքրքրվում է թեմայով, ուսումնասիրում հարցի մանրամասները, տեղեկացված լինում ամեն մանրուքին, և հեռանալու ժամանակը գալիս է, իսկ այսպես՝ մեկը մշտապես կզբաղվի այդ հարցով: Կարծում եմ՝ որոշման պատճառն այդ է, ուրիշ մեսիջներ փնտրել պետք չէ»:
Հիշեցնենք, որ դեսպան Ռոբերտ Բրադտկեն ԵԱՀԿ Մինսկի խմբում ԱՄՆ համանախագահի իր առաքելությունն ավարտել է 2012թ. դեկտեմբերին: ԱՄՆ-ի ժամանակավոր համանախագահն է դեսպան Յան Քելին:
