Լոնդոնի կենտրոնում հայտնաբերել են «Սև մահվան» համաճարակի ժամանակների գերեզմանատուն: Հայտնագործությունն արվել է արագընթաց երկաթուղային գծի կառուցման ժամանակ: Այս մասին հայտնում է BBC-ն:
Մարմինները նկատվել են Charterhouse Square շրջանում թունելի կառուցման ժամանակ: Առաջին մարմինները հայտնաբերվել էին երկու շաբաթ առաջ: Մարտի 15-ի դրությամբ հայտնաբերվել է 13 դի: Հուղարկավորման վայրում պեղումները շարունակվում են: Հարակից հայտնաբերված կավե իրերը վկայում են այն մասին, որ հուղարկավորությունները կատարվել են XIV դարի կեսերին:
Փորձագետների կարծիքով՝ ուղիղ դասավորված մարմինները վկայում են այն մասին, որ հուղարկավորությունը կատարվել է համաճարակի սկզբին, երբ դեռ զոհերի թիվը քիչ էր: Հետագա փուլերում դիակները եղբայրական գերեզմաններն են լցվել խառնիխուռն:
Հայտնաբերված կմախքներից հավաքված ԴՆԹ նմուշները կարող են լույս սփռել այն հարցի վրա, թե ինչպես է զարգացել և տարածվել ժանտախտի ցուպիկը «Սև մահվան» ժամանակներից մինչև մեր օրերը:
Ընդհանուր 16 միլիարդ ֆունտ արժեքով Crossrail գծի շինարարությունը սկսվել էր 2009 թվականին: Մինչև 2018 թվականը արագընթաց երկաթուղային մագիստրալը Լոնդոնում և հարակից շրջաններում կմիավորի 39 կայարան: Երկաթգծի շինարարությունը բրիտանական խոշորագույն հնագիտական նախագիծ է