Ռուսական «Կոմերսանտ» թերթի փոխանցմամբ՝ Ռուսաստանում Իրանի դեսպան Մեհդի Սանաին հայտարարել է, որ երկու երկրները պայմանավորվել են Իրանից ցածր հարստացված ուրանի ավելցուկը բնական ուրանով փոխանակելու շուրջ։ Նա հավելել է, որ Ֆորդոում գործող կայուն իզոտոպների արտադրության կենտրոնը գործելու է Ռուսաստանից ժամանած մասնագետների օգնությամբ։
Իրանցի դեսպանը հայտարարել է, որ Իրանի նկատմամբ սահմանված պատժամիջոցների վերացումը կնպաստի երկու երկրների միջև էներգետիկ ոլորտում համագործակցության ընդլայնմանը. «Բացի այդ, Իրանի ու Ռուսաստանի միջև կձևավորվի միջուկային նոր համագործակցություն։ 2014 թվականի նոյեմբերին ստորագրվել է Բուշեհրի ատոմակայանի համար երկու նոր էներգաբլոկների կառուցման մասին պայմանագիր և ոլորտում ռուս-իրանական համագործակցության երկու այլ փաստաթղթեր։ Երկու երկրների միջև ֆինանսական շրջանառության խոչընդոտների վերացմամբ այդ փաստաթղթերը կստանան կյանքի կոչվելու էլ ավելի մեծ հնարավորություն»։