Շվեյցարական UBS-ն Անդրեա Օրսելուին, ով նոյեմբերի 1-ից ղեկավարում է բանկի ներդրումային բաժինը, 26,2 միլիոն դոլար է վճարել, որպեսզի նա համաձայնի տեղափոխվել Bank of America-ից: Այս մասին տեղեկացրել է The Financial Times հրատարակչությունը՝ հղում կատարելով UBS-ի 2012 թ. զեկույցին:
Բանկի հետ կնքված համաձայնագրի արդյունքում Օրսելը, որպես «ոսկե ողջույն», 6,364 միլիոն դոլար կստանա, իսկ մնացած գումարը կստանա UBS-ի բաժնետոմսերով: Ընդ որում, վճարները միաժամանակ չեն լինի, այլ կձգվեն մինչև 2015 թ.:
Ավելի վաղ եվրոպական բանկերը, այդ թվում՝ նաև UBS-ը, բազմաթիվ անգամներ քննադատվել են ֆինանսական և տնտեսական ճգնաժամի ֆոնին թոփ-մենեջերներին հսկայական վճարումներ անելու պատճառով: Վարկային կազմակերպությունների աշխատակիցներն, իրենց հերթին, պնդում են, որ չեն կարող կտրուկ նվազեցնել ղեկավարների աշխատավարձերը, քանի որ նրանք անհապաղ կտեղափոխվեն մրցակից բանկեր:
Մարտի սկզբին բանկիրների աշխատավարձերի մասին հարցը դրվել է հանրաքվեի: Շվեյցարացիների մեծամասնությունը քվեարկել է այն բանի օգտին, որպեսզի վարկային կազմակերպությունների բաժնետերերը արգելափակեն թոփ-մենեջերներին մեծ վճարումներ կատարելու վերաբերյալ ղեկավարության որոշումները:
Իտալացի Անդրեա Օրսելն ավարտել է Հռոմի համալսարանը, սակայն ամբողջ կյանքում ԱՄՆ-ում է աշխատել, սկզբում՝ Goldman Sachs-ում և Boston Consulting Group-ում, այնուհետև՝ Merrill Lynch-ում: Bank of America Օրսելը մտել է այն բանից հետո, երբ այդ վարկային կազմակերպությունը կլանել է Merrill Lynch-ին: