Հայաստանում գործող ռուսական ընկերություններն այս տարի կրճատել են իրենց վճարած հարկերը: Ընդ որում՝ այդ ընկերությունները հիմնականում գտնվում են 1000 խոշոր հարկատուների առաջին հորիզոնականներում: Ավելին՝ այդ ընկերությունները մեր երկրի ռազմավարական նշանակության օբյեկտներ են և գործում են հանրային ծառայությունների ոլորտում: Այսինքն՝ այդ ընկերությունները ամեն օր առանձին-առանձին մտնում են Հայաստանի յուրաքանչյուր ընտանիք, յուրաքանչյուր քաղաքացու գրպանը: Մեր երկրի յուրաքանչյուր քաղաքացի անխտիր ամեն օր սպառում է ռուսական այս ընկերությունների ապրանքը կամ ծառայությունը: Այդ ընկերությունները նաև մենաշնորհային դիրք են զբաղեցնում իրենց ոլորտներում: Ռուսական այդ ընկերությունները համակարգում են մեր երկրի էներգետիկ ու կապի շատ կարևոր ոլորտները:
Եվ այսպես՝ Հարկային ծառայության հրապարակած խոշոր հարկատուների ցանկում ռուսական «ԳազպրոմԱրմենիա» ընկերությունը զբաղեցնում է առաջին հորիզոնականը 2015թ. առաջին կիսամյակում իր վճարած 24 միլիարդ 616 միլիոն դրամ հարկով: 2014թ. առաջին կիսամյակում այս ընկերությունը վճարել էր 23 մլրդ 366 մլն դրամ: Հայաստանի էներգետիկ ոլորտում ռուսական երկրորդ ընկերությունը, որն այս ցանկում զբաղեցնում է երրորդ հորիզոնականը, «Հայաստանի էլեկտրական ցանցեր» ընկերությունն է: Այն այս տարվա առաջին կիսամյակում վճարել է 8 մլրդ 833 մլն դրամ՝ անցած տարվա 5 մլրդ 477 մլն դրամի փոխարեն: Ճիշտ է, այս երկու ընկերություններն այս տարի ինչ-որ չափով ավելացրել են իրենց վճարած հարկերը, բայց ՌԴ-ին պատկանող և մեր երկրում գործող մի շարք ընկերություններ այս տարի պակասեցրել են իրենց հարկերը:
Բջջային կապի ոլորտում գործող «Արմենիա տելեֆոն կոմպանի» ընկերությունը, որը հայտնի է Beeline ապրանքանիշով, այս տարվա առաջին եռամսյակում վճարել է մոտ 7,7 մլրդ դրամ հարկ, մինչդեռ այդ ընկերությունը անցած տարվա նույն ժամանակաընթացքում վճարել էր մոտ 8,6 մլրդ դրամ՝ մոտ 840 մլն դրամով պակասեցնելով հարկերը: Բջջային կապի ծառայություն մատուցող ռուսական մյուս՝ «Ղ-Տելեկոմ» ընկերությունը 2014թ. առաջին ամիսներին վճարել էր 10 մլրդ 239 մլն դրամ, մինչդեռ այս տարի կտրուկ՝ ավելի քան կրկնակի նվազեցնելով հարկերը՝ վճարել է 4,2 մլրդ դրամ:
Իր հարկերը նվազեցրել է նաև Հայաստանի երկաթգծի կառավարումն իրականացնող «Հարավկովկասյան երկաթուղի» ընկերությունը՝ 1 մլրդ 844 մլն դրամից հասցնելով 1 մլրդ 765 մլն դրամի: Ավիացիայի ոլորտում գործող ռուսական «Աէրոֆլոտ» ավիաընկերությունն այս տարվա առաջին կիսամյակում վճարել է 1 մլրդ 293 մլն դրամ, անցած տարվա նույն ժամանակահատվածում վճարել էր 1 մլրդ 274 մլն դրամ: Այս ընկերությունը մի փոքր ավելացրել է հարկերը: Այս դեպքում էլ կարծիք կա, որ ռուսական այս ընկերությունը աստիճանաբար գրավում է Հայաստանի ավիաշուկան: «Արմավիայի» սնանկացումից և ավիաշուկայից դուրս գալուց հետո Հայաստանի իշխանություններն այս ոլորտում «բաց երկնքի» քաղաքականություն հայտարարեցին: Բայց արդյունքում մեր երկրի ավիաշուկայում գործող եվրոպական ընկերությունների մեծ մասը փակվեցին: Նրանց փոխարեն Հայաստանի ավիացիայի շուկայում իր դիրքերը ընդլայնեց ռուսական այս ընկերությունը: Ավելին՝ մի քանի տարի առաջ ստեղծվեց «Էյր Արմենիա» ավիաընկերությունը, որը պատկանում էր կառավարության աշխատակազմի ղեկավար-նախարար Դավիթ Հարությունյանի եղբորը՝ Վահան Հարությունյանին: Այս ընկերությունը ստացավ դեպի Ռուսաստան ամենաեկամտաբեր վեց՝ Երևան-Մոսկվա, Երևան-Կրասնոդար և այլ երթուղիներով չվերթ իրականացնելու թույլտվությունը, սակայն չդիմանալով ռուսական այս ընկերությունների հետ մրցակցությանը՝ դադարեցրեց գործունեությունը:
Նշենք նաև, որ այս ընկերություններից հատկապես էներգետիկ ոլորտում գործող ՀԷՑ-ի և «ԳազպրոմԱրմենիայի» դեպքում վստահություն կա, որ թաղված են կոռուպցիոն խնդիրների մեջ: Երկուսի դեպքում էլ հանրային կարծիք կա, որ մատակարարած թե՛ էլեկտրաէներգիան, թե՛ գազը ՀՀ քաղաքացիներին վաճառում են շատ բարձր գնով, բայց շատ ցածր որակով: Եվ այս երկու ընկերությունների նկատմամբ էլ թե՛ քաղաքացիների մոտ, թե՛ քաղաքական շրջանակներում կա մեծ դժգոհություն:
Իսկ ընդհանուր առմամբ ռուսական այս ընկերությունները միասին այս տարվա առաջին կիսամյակում վճարել են մոտ 47,9 միլիարդ դրամ հարկ անցած տարվա 51,6 մլրդ դրամի փոխարեն: Այսինքն՝ այս ընկերությունները մոտ 3,5 մլրդ դրամով այս տարի նվազեցրել են իրենց հարկերը:
