Արդյոք առաջիկայում կստեղծվի հասարակական-քաղաքական լայն կոնսոլիդացիա՝ ընդդեմ սահմանադրական փոփոխությունների: Չէ որ ոչ իշխանական ուժերի մեծ մասը դեմ է այդ փոփոխություններին և սահմանադրական փոփոխությունների ներկայացված նախագծին: Ամեն դեպքում իշխող Հանրապետական կուսակցությունից բացի՝ խորհրդարանական ուժերից դեռևս միայն «Դաշնակցություն» կուսակցությունն է դրական համարում այդ փոփոխությունները: Սահմանադրական փոփոխություններին դեմ են նաև մի շարք քաղաքացիական նախաձեռնություններ, այդ թվում՝ որոշակիորեն ակտիվ գործող Հիմնադիր խորհրդարանը:
Այսինքն՝ եթե, իսկապես, այս ուժերը դեմ են այդ փոփոխություններին, չեն ցանկանում, որ իշխանությունները փոխեն ՀՀ Սահմանադրությունը կամ փոխելու դեպքում էլ ոչ այս նախագիծը ներկայացնեն հանրաքվեի, պետք է որ պայքարեն դրա դեմ: Եվ հայտնի է, որ պայքարն արդյունավետ դարձնելու համար անհրաժեշտ է, որ այն տարբեր ուժերով համախմբված լինի: Եվ առաջին հայացքից թվում է, որ այդ համախմբումն ու պայքարը պետք է լինի, քանի որ, ինչպես նշեցինք, Հայաստանի քաղաքական դաշտում գործող հիմնական ուժերը դեմ են արտահայտվել այդ փոփոխություններին կամ գոնե ծանրակշիռ մտահոգություններ են հայտնում ներկայացված նախագծի նկատմամբ:
Ընդդիմադիր կուսակցություններից ՀԱԿ-ը, օրինակ, ներկայացնելով իր առարկությունները, ներկայացված նախագծի դեմ քաղաքական ու հասարակական ուժերին կոչ է անում դիմադրության լայն ճակատ ստեղծել: «Երկրին սպառնացող վտանգից խուսափելու միակ ճանապարհը քաղաքական ուժերի և ընդհանրապես ամբողջ հասարակության համախմբումն ու դիմադրության լայն ճակատի ստեղծումն է: Հայ Ազգային Կոնգրեսը իր բոլոր ուժերն ու հնարավորությունները կներդնի դիմադրության այդ ճակատը ձևավորելու համար և կոչ է անում քաղաքական և հասարակական բոլոր միավորներին, մի կողմ դնելով տարաձայնությունները՝ միանալ պայքարին: Հայ Ազգային Կոնգրեսը վստահ է, որ Հայաստանի պետականությանը սպառնացող այս վտանգը համազգային դիմադրության և հակազդեցության կարժանանա ողջ աշխարհի հայության կողմից»,- նշված է ՀԱԿ-ի՝ հուլիսի 23-ին հրապարակած հայտարարության մեջ:
Արդյոք քաղաքական դաշտի այն ուժերը, որոնք դեմ են սահմանադրական փոփոխություններին կամ գոնե այդ գործընթացների նկատմամբ վերապահումներ ունեն, պատրաստակամ են ձևավորել նման ճակատ:
Հիշեցնենք, որ դեռևս 2012թ. խորհրդարանական ընտրություններից առաջ ոչ իշխանական ուժերը՝ ՀԱԿ, «Ժառանգություն», «Դաշնակցություն կուսակցություններն ու անգամ դեռևս կոալիցիայում գտնվող «Բարգավաճ Հայաստան» կուսակցությունը միասին Միասնական շտաբ էին ձևավորել և քննարկում էին, թե ինչպես պայքարեն ընտրակեղծիքների դեմ: Իսկ արդեն նախագահական ընտրություններից հետո այս ուժերը ձևավորեցին ոչ իշխանական հայտնի քառյակը, որը պայքարում էր կուտակային կենսաթոշակային համակարգի դեմ: Ճիշտ է, քառյակը չկարողացավ կասեցնել այդ համակարգի ներդրումը, այն հիմա գործում է, բայց կարողացավ հասնել նախկին վարչապետ Տիգրան Սարգսյանի հրաժարականին, ով այդ համակարգի նախաձեռնողն էր: Հանուն արդարության կարելի է նաև ավելացնել, որ ոչ իշխանական քառյակն իրականում հենց Տ. Սարգսյանի դեմ էլ պայքարում էր: Նրանց այդ գործի շուրջ համախմբել է ԲՀԿ նախկին ղեկավար Գագիկ Ծառուկյանը, և ասում են՝ նաև այն ժամանակ դեռևս Ազգային ժողովի նախագահ Հովիկ Աբրահամյանը: Այսինքն՝ այդ համախմբումն ու պայքարը որոշակի արդյունք ունեցան: Բայց իշխանությունները, մասնավորապես Սերժ Սարգսյանը, այդ համախմբումը փլուզեցին այս տարվա փետրվարին, երբ զգացին, որ այն կարող է սպառնալ իրենց դիրքերին:
Նման արդյունքներ գրանցած ուժերը կարո՞ղ է համարձակվեն ու ևս մի համախմբում ձևավորեն: Այս անգամ՝ ընդդեմ սահմանադրական փոփոխությունների: «Օրինաց երկիր», «Բարգավաճ Հայաստան» և «Ժառանգություն» կուսակցությունների ներկայացուցիչները մեզ հետ զրույցում չբացառեցին, բայց ավելացրեցին, որ նման հարց չեն քննարկել:
ՕԵԿ պատգամավոր Հովհաննես Մարգարյանը մեզ հետ հեռախոսազրույցում պարզապես տարօրինակ համարեց, որ Սահմանադրական բարեփոխումների հանձնաժողովը թեև ընդունել է իրենց ներկայացրած առաջարկությունները, սակայն դրանցից որևէ մեկը չի ներառել ներկայացված նախագծում: Այդ հանգամանքը կդառնա՞ պատճառ, որ ՕԵԿ-ը պայքարի այդ փոփոխությունների դեմ: «Ներկայացված տեքստը մեզ համար անընդունելի է: Քննարկումների արդյունքում մենք կգտնենք այն տարբերակը, այն ֆորմատը, թե ինչպես արտահայտենք մեր դիրքորոշումը»,- ասաց պատգամավորը:
ԲՀԿ մամլո խոսնակ, պատգամավոր Վահան Բաբայանն էլ ավելացրեց, որ իրենց օրակարգում դեռ համախմբվելու կամ այդ փոփոխությունների դեմ պայքարելու հարց չկա: ԲՀԿ-ն դեռ շարունակում է ուսումնասիրել հրապարակված նախագիծը: «Այնտեղ կան լրջագույն կետեր, որոնք վերաբերում են մեր երկրի ներկային ու ապագային: Եվ մենք չենք կարող այդ հարցում դիտորդ լինել: Մենք այս պահին լրջորեն ուսումնասիրություններ ենք կատարում, մեր սահմանադրագետ մասնագետներն ուսումնասիրում են նախագիծը: Երբ որոշակի կլինեն բոլոր պլյուսներն ու մինուսները, մենք այն ժամանակ մեր դիրքորոշման մասին տեղյակ կպահենք հանրությանը: Բայց այս պահին «Ոչ»-ի կամ «Դեմ եմ»-ի ֆորմատ ձևավորելու որևէ քննարկում չկա»,- պատասխանեց Վ. Բաբայանը:
Պայքարի հարցը դեռ չի քննարկվել նաև «Ժառանգություն» կուսակցությունում: «Կարծում եմ, որ ոչ միայն քաղաքական ուժերի, այլ նաև ավելի լայն դիմադրության ճակատի հնարավորություն կա, որովհետև բացի Հանրապետական և «Դաշնակցություն» կուսակցություններից, մյուս բոլորը իրականում դեմ են այդ փոփոխություններին: Իսկ մնացածը ժամանակը ցույց կտա: Բնականաբար մեզ մոտ նմանատիպ քննարկումներ անպայման կլինեն: Երբ փոփոխությունների նախագիծն ամբողջովին կհրապարակվի, այդ ժամանակ նոր պարզ կդառնա մեր անելիքը»,- ասաց Ա. Մարտիրոսյանը:
Հիշեցնենք նաև, որ ՀԱԿ-ը միաժամանակ դիմում էր միջազգային կազմակերպություններին՝ «որևէ կերպ չաջակցել Հայաստանի իշխանության այս արկածախնդրությանը՝ այն համարելով հակաժողովրդավարական նախաձեռնություն և Հայաստանում բռնապետություն հաստատելու փորձ»:
Լուսանկարը՝ Armenpress-ի
