Ադրբեջանական Turan լրատվական գործակալության փոխանցմամբ՝ ԱՄՆ Պետդեպարտամենտը դատապարտել է հանրահայտ վտարանդի լրագրողներ Գանիմաթ Զահիդովի ու Էմին Միլիի հարազատներին Ադրբեջանում հալածելու փաստերը։
«Մենք խորապես մտահոգ ենք Ադրբեջանում քաղաքացիական հասարակության ու ակտիվիստների գործունեության սահմանափակումների, լրագրողների ու հասարակական գործիչների հալածանքների ու կալանավորումների կապակցությամբ։ Մենք համառորեն Ադրբեջանի իշխանություններին կոչ ենք անում հարգել սեփական քաղաքացիների հիմնարար իրավունքները և նրանց հնարավորություն տալ ազատորեն արտահայտելու իրենց հայացքները։
Քաղաքացիական հասարակության հետ իշխանությունների համագործակցությունը չափազանց կարևոր է Ադրբեջանի կայուն ապագայի համար։ Մենք քանիցս այդ մասին հիշեցրել ենք երկրի կառավարությանը՝ կոչ անելով կատարել անկախ մամուլի պաշտպանության մասով ստանձնած պարտականությունները։
Գանիմաթ Զահիդովի ու Էմին Միլիի հարազատները կալանավորվել են ոչ քաղաքական մեղադրանքներով։ Սակայն նրանք դա կապում են իրենց լրագրողական գործունեության հետ։ Դա Ադրբեջանում արդեն սովորական դարձած պրակտիկա է, երբ լրագրողներին ու ակտիվիստներին հետապնդում են ոչ քաղաքական հոդվածներով՝ թմրանյութերի պահում, խուլիգանություն, հարկերից խուսափում»,- հայտարարել է Պետդեպը։
Գործակալությունն ընդգծում է, որ Ադրբեջանում կալանավորվել են Գանիմաթ Զահիդովի 4 ազգական և Էմին Միլիի 1 ազգական։
