«Հայաստանի էլեկտրական ցանցեր» ընկերության ճակատագիրը շարունակում է անհայտ մնալ: Գրեթե մեկ ամիս առաջ խոստացված աուդիտը այդպես էլ չի կազմակերպվում, չնայած կառավարությունը ինքը պետք է ամենաշահագրգիռը լիներ աուդիտի կազմակերպման գործում: Որովհետև հենց կառավարությունն է պատրաստակամություն հայտնել իր վրա վերցնել էլեկտրաէներգիայի չթանկացման համար անհրաժեշտ միջոցներ գտնելու և թանկացումը փոխհատուցելու պարտավորությունը, և որքան ուշ կազմակերպվի աուդիտը, այնքան ուշ կլինի եզրակացությունը, և այնքան ավելի երկար կառավարությունը ստիպված կլինի վճարել էլեկտրաէներգիայի չթանկացման համար: Այնպես որ, կառավարությունը պետք է ամենաշահագրգիռը լիներ ՀԷՑ-ի ճակատագրի հստակեցմամբ:
Պարզվում է, որ կառավարության անտարբերությունը աուդիտի կազմակերպման հարցում այլ հիմնավորում ունի: Կառավարությունը առանց աուդիտի արդյունքների էլ հստակեցրել է ՀԷՑ-ի ճակատագիրը: Մասնավորապես՝ մեզ հայտնի դարձավ, որ վարչապետ Հովիկ Աբրահամյանը օրերս իր մերձավոր շրջապատի ներկայացուցիչների հետ հանդիպան ժամանակ հայտնել է, որ մինչև հոկտեմբեր ամիս ՀԷՑ-ի սեփականատերը փոխվելու է, և այն ձեռք է բերելու Սամվել Կարապետյանը: Աբրահամյանը վստահեցրել է, որ այս պայմանավորվածությունը կայացվել է Ռուսաստանի իշխանությունների հետ ամենաբարձր մակարդակով:
Այս լուծումը լավագույնը կարելի է համարել ոչ թե Հայաստանի կամ հայ հասարակության, այլ Ռուսաստանի համար: Այսօր ՀԷՑ-ի սեփականատերը Ռուսաստանի պետական ԻՆՏԵՌ ՌԱՕ ԵԷՍ ընկերությունն է: Այս ընկերության համար Հայաստանում ունեցած ակտիվը տնտեսական ոչ մի նշանակություն չունի, քանի որ այն աշխատում է վնասով, և ընկերությանը ոչ մի եկամուտ չի ապահովում: Դրա փոխարեն այն ռուսական պետության համար դարձել է պերմանենտ գլխացավի աղբյուր: Էլեկտրաէներգիան անընդհատ թանկանալու է՝ օբյեկտիվ և սուբյեկտիվ պատճառներով, և հայ հասարակությունը ամեն անգամ ընդվզելով այդ թանկացումների դեմ՝ ընդվզելու է Ռուսաստանի դեմ, այդ թանկացումների հիմնական պատասխանատու համարելով Ռուսաստանին:
Ռուսաստանը չի կարող իրեն թույլ տալ վաճառել «Հայաստանի էլեկտրական ցանցեր» ընկերությունը: Չի կարող թույլ տալ, որպեսզի այն հատնվի որևէ արևմտյան ընկերության վերահսկողության տակ, քանի որ Ռուսաստանը այստեղ ունի ռազմաբազաներ և սահմանապահ զորքեր, և թեկուզ միայն այն պատճառով, որ էներգամատակարարող ընկերությունը կարող է ռուսական բազաներն անջատել էներգամատակարարումից Ռուսաստանին ստիպելու է ՀԷՑ-ը պահել իր հսկողության տակ: Բացի այդ, ՀԷՑ-ը Հայաստանում քաղաքական ազդեցության լուրջ լծակ է: Այս ընկերության գրեթե 8 հազարի հասնող կոլեկտիվը մուտք ունի Հայաստանի բոլոր բնակարաններ, ձեռնարկություններ և ընկերություններ: Այնպես որ, ռուսները ոչ մի պարագայում չեն ցանկանա կորցնել վերահսկողությունը ՀԷՑ-ի նկատմամբ, սակայն դեմ չեն լինի, որ ռուսական ԻՆՏԵՌ ՌԱՕ ԵԷՍ-ի փոխարեն այն պատկանի ռուսաստանաբնակ Սամվել Կարապետյանին: Ռուսական պետությունը Սամվել Կարապետյանի վրա երևի ավելի մեծ ազդեցություն ունի, քան պետական ԻՆՏԵՌ ՌԱՕ ԵԷՍ ընկերության վրա:
Եթե Կարապետյանը որոշի բարձրացնել էլեկտրաէներգիայի սակագինը, հայ հասարակությունը, անշուշտ, կընդվզի այդ բարձրացման դեմ, բայց ռուսների տրամաբանությամբ՝ այդ ընդվզումն այլևս ուղղված չի լինի ռուսական պետության և Հայաստանում Ռուսաստանի ներկայության դեմ: Հայ հասարակությունը ընդամենը կհամարի, որ Սամվել Կարապետյանը որպես դասական հայ օլիգարխ ավելի շատ փող աշխատելու ախորժակ ունի և չբավարարվելով իր ունեցած միլիարդներով՝ փորձում է իր ունեցվածքը ավելացնել հայ սպառողների հաշվին: Իսկ քանի որ Սամվել Կարապետյանին նման մեղադրանքներ պետք չեն, նա կփորձի ավելի արդյունավետ կառավարել ընկերությունը, պակասեցնել այնտեղ կատարվող գողությունը, և ՀԷՑ-ը դարձնել շահույթով աշխատող ընկերություն, որը հնարավոր է նաև գործող սակագնի պայմաններում: Բայց դա արդեն Ռուսաստանի իշխանությանը չի հետաքրքրում, նրանք իրենց խնդիրը կհամարեն լուծված, քանի որ ստիպված չեն լինի ամեն անգամ Ռուսաստանի դեմ ուղղված «էլեկտրամայդանի» ականատեսը լինել:
Ինչ վերաբերում է այն հարցին, թե ինչ կարող է շահել հայ սպառողը այս գործարքի արդյունքում, ապա ամենայն հավանականությամբ գոնե առաջիկա մեկ տարում կարելի է սպասել, որ նոր սեփականատերը չի թանկացնի էլեկտրաէներգիայի սակագինը: Դժվար թե Սամվել Կարապետյանը, ձեռք բերելով ընկերությունը, իր գործունեությունը սկսի նման ոչ պոպուլյար քայլով: Իսկ իշխանությունն էլ կազատվի իր համար այդքան ատելի Բիբինից, որի հետ աշխատելը և նրա հետ պայմանավորվելը բավական դժվար էր դարձել:
Լուսանկարը՝ PanARMENIAN Photo-ի
