Սա ընդամենը «due diligence» է, այսինքն՝ ստանդարտ ընթացակարգ, երբ պոտենցիալ ներդրողը դրան է գնում, որպեսզի հասկանա ոլորտում ներդրումային ռիսկերը»,-«Առաջին լրատվական»-ի հետ զրույցում ասաց տնտեսագետ Արտակ Մանուկյանը՝ անդրադառնալով հանրային ծառայությունները կարգավորող հանձնաժողովի այսօրվա որոշմանը:
Հիշեցնենք, որ այսօր ՀԾԿՀ նիստում որոշվեց, որ առաջիկայում միջազգային 5 ամենահայտնի խորհրդատվական ընկերություններից մեկը ուսումնասիրություններ կսկսի Հանրային ծառայությունները կարգավորող հանձնաժողովում՝ պարզելու, թե որքանով էր հիմնավորված հունիսի 17-ին էլեկտրաէներգիայի սակագնի վերանայման մասին հանձնաժողովի որոշումը:
Խորհրդատվական ընկերության հիմնական նպատակը պետք է լինի հիմնավորված պատասխաններ ստանալը՝ երկու հարցի վերաբերյալ՝ ինչքանո՞վ էր հիմնավորված հոսանքի սակագնի բարձրացումը, ինչպես նաև սակագնի բարձրացման դեպքում ինչպիսի՞ վտանգներ են սպառնում էներգետիկ համակարգին:
Բացի դրանից՝ հանձնաժողովի անդամները պնդեցին, թե այս գործընթացը ուղղված է հանրության մոտ վստահության բարձրացմանը:
Մինչդեռ, տնտեսագետի խոսքով, հասարակության մոտ վստահությունը կբարձրանար այն ժամանակ, երբ որ տեխնիկական առաջադրանքը իրականացվեր հենց հասարակության մասնակցությամբ, իսկ այս դեպքում տեխնիկական առաջադրանքը անգամ հստակ չէ: Մասնավորապես ուսումնասիրության առարկա չի դարձել չարաշահումների հարցը, որը հասարակությանն ամենաշատն էր հուզում:
Բացի դրանից՝ տնտեսագետի խոսքով՝ հանձնաժողովի հայտարարության մեջ խոսքը վերաբերում է գործընթացի շատ սեղմ ժամկետներին, ինչը, նրա խոսքով, լուրջ չէ: Չկան նաև ավարտի հստակ ժամկետներ: «Իսկ եթե մենք ականատես ենք լինում նման սեղմ ժամկետների, ապա դա նշանակում է, որ իրենք նախապես բանակցել են այդ ընկերությունենրի հետ, և մենք ականատես կլինենք ոչ թափանցիկ մի գործընթացի, որը անգամ ավարտի ժամկետներ չունի»,- նկատեց Մանուկյանը:
Մեր զրուցակցի խոսքով՝ այս ամենը, ըստ էության, կազմակերպվել է նրա համար, որ վերջնահաշվում ցույց տան, որ ՀԷՑ-ում սպասվող աուդիտը հենց սա էր, ու եթե հանրային ճնշումը մի քիչ ուժեղանա, իրենք մանևրելու դաշտ կունենան և կհայտարարեն. «Կներեք, սա ուրիշ էր, սա նա չէր, սպասե՛ք աուդիտի»:
Ծախսային արդյունավետության տեսանկյունից, Մանուկյանի խոսքով, ընդհանրապես անտրամաբանական է: Կարելի էր ավելի օպտիմալ լուծում գտնել: Եվ բնավ պետք չէր նույն գործի համար առանձին վճարել՝ մեկը աուդիտի համար, մյուսը՝ ՀԾԿՀ-ի որոշումները ուսումնասիրելու: «Կարելի էր մեկ անգամ վճարել, ծախսային խնայողություններ անել: Բայց քանի որ դա չարվեց, ապա այս ամենից ես միայն մեկ հետևության եմ գալիս, որ սա due diligence է, որը արվում է պոտենցիալ ներդրողի համար հեռանկարները պարզելու նպատակով»:
Ինչ վերաբերում է նրան, թե միջազգային խորհրդատուի ուսումնասիրությունների արդյունքում հնարավոր է սակագինը վերանայվի, տնտեսագետն ասաց, որ դա բացառված է, քանի որ ՀԾԿՀ-ի ընդունված սակագնի վերաբերյալ որոշման նախագիծը, որը կարելի էր 7 օրվա մեջ բողոքարկել դատարանում, օրենսդրորեն վերանայման այլ ընթացակարգ չկա: «Չեմ պատկերացնում, որ օրենսդրորեն հնարավոր է ինչ-որ միջազգային խորհրդատվական ընկերության ուսումնասիրությունների արդյունքում սակագին վերանայվի, և ՀԾԿՀ որոշումը վերանայվի»,- ասաց Մանուկյանը:
