Հարցումը, որին մասնակցել են Վատիկանի հարցով մասնագետներ, ցույց է տվել, որ իտալացի կարդինալ Անջելո Սկոլան երեքշաբթի մեկնարկած կոնկլավի գլխավոր ֆավորիտն է,- հաղորդում է La Stampa իտալական թերթը:
Հարցման մասնակիցների 35%-ի կարծիքով՝ հենց Սկոլան, ամենայն հավանականությամբ, կդառնա Հռոմի նոր պապ:
Ապա հաջորդում են ամերիկացի Թիմոտի Դոլանը (10.6%) և կանադացի Մարկ Ուելեն (9.3%): Պոնտիֆիկ դառնալու որոշակի հնարավորություններ ունեն նաև բրազիլացի Օդիլիու Շերերը (8.7%) և ամերիկացի Շոն Օ’Մելին (7.9%):
Միևնույն ժամանակ, փորձագետների զգալի մասը ենթադրում է, որ ֆավորիտներից ոչ մեկին չի հաջողվի պապ դառնալ: 21.5%-ը կարծում է, որ քվեարկությունում կհաղթի «աութսայդերներից» մեկը:
Հարցմանը մասնակցել են Վատիկանի հարցով մասնագետներ, որոնք աշխատում են իտալական և արտասահմանյան 15 խոշոր ԶԼՄ-ներում:
Corriere della Sera թերթում Ջան Գուիդո Վեկին գրում է, որ եթե մինչև հինգշաբթի Սիսքստինյան կապելլայից սպիտակ ծուխ չբարձրանա, ապա կոնկլավի մասնակիցները կընտրեն «աութսայդերներից»:
Հոդվածագիրը նշում է, որ կոնկլավի ընթացքում ամեն ինչ անկանխատեսելի է, կարող են անակնկալներ լինել:
Հիշեցնենք, որ կոնկլավի առաջին օրը, որը կայացել է երեքշաբթի, սպասող հավատացյալներին և դիտորդներին տեղեկացրել են այն մասին, որ կարդինալների առաջին քվեարկությունը չի որոշել Կաթոլիկ եկեղեցու նոր ղեկավարին: Քանի դեռ չի ընտրվել Հռոմի նոր պապ, կարդինալները լինելու են արտաքին աշխարհից լիակատար մեկուսացման մեջ:
