«Դո՛ւրս մեր գրպանից» քաղաքացիական նախաձեռնությունը սեպտեմբերից դիմելու է կտրուկ գործողությունների՝ նոր փուլ մտցնելով տեսախցիկների, արագաչափերի, կարմիր գծերի դեմ պայքարը:
«Առաջին լրատվական»-ի հետ զրույցում նախաձեռնության անդամ Արման Սուլեյմանյանը նշեց, որ ՃՈ-ի հետ բանակցությունները տապալված են համարում, քանի որ ՃՈ-ն այդպես էլ չի ընդունում, որ տեսախցիկներով միայն մարդկանց գրպանն են մտնում, ոչ թե երթևեկությունը կանոնակարգում, պատահարների թիվը նվազեցնում:
Նախաձեռնության գերնպատակը համակարգային փոփոխությունն է: Մենք ոչ մի խնդիր չունենք այն անձանց հետ, ովքեր ներկայացնում են ՃՈ-ն, գիտակցում ենք, որ խնդիրը խորքային է: Տեսեք՝ Երևան քաղաքի երթևեկությունը, կարճ ասած, հիվանդ է, իսկ հիվանդությունը բուժելու համար միայն վիրաբուժական մեթոդները չեն օգնում: 2012 թվականից տեղադրվել են տեսախցիկներ, 3 տարվա ընթացքում ունենք միայն ճանապարհատրանսպորտային դեպքերի աճ: Խնդիրը չի լուծվում և չի էլ լուծվելու: Պետք է կիրառել կարգազանց վարորդներին պատասխանտվության ենթարկելու այլ մեթոդներ»,- ասաց նա՝ հավելելով, որ աստղաբաշխական գումարներ կորզելը խնդրի լուծում չէ:
Նրա խոսքով՝ ոստիկանությունն այսօր միայն տուգանում է, կարգազանց վարորդների համար այլ պատիժ չունեն. «Դու վարում ես 300 կմ/ժամ արագությամբ ամեն օր, խնդիր չկա՝ մուծիր, միևնույն է՝ ինչ կլինի՝ վթարի կենթարկվեն թե ոչ, մահվան ելք կլինի թե ոչ»:
Ակտիվիստի համոզմամբ՝ ակնհայտ է, որ համակարգի նպատակը նորմալ երթևեկություն ապահովելը չէ, ուստի հարց է առաջանում՝ ի՞նչ իմաստ ունի տեղադրել այդ համակարգերը, եթե դրանք ոչ մի դրական ազդեցություն չունեն:
Արման Սուլեյմանյանը նկատեց, որ իրենք նպատակ ունեն նաև սահմանել խաղի հավասար կանոններ՝ պատասխանատվության դաշտ բերելով նաև կարգազանց պաշտոնյաներին, շքեղ մեքենաներով ու գնված վարորդական իրավունքներով մարդկանց:
Մանրամասները՝ տեսանյութում:
