Ադրբեջանական Turan լրատվական գործակալության փոխանցմամբ՝ Եվրոպական խորհրդի ղեկավար Դոնալդ Տուսկը Բաքվում Ադրբեջանի նախագահ Իլհամ Ալիևի հետ համատեղ մամուլի ասուլիսի ժամանակ կրկնել է մեկ օր առաջ Երևանում հնչեցրած կոչերը։ Տուսկն ընդգծել է, որ ԵՄ-ն կողմ է Ղարաբաղյան հակամարտության կարգավորմանը։
Տուսկը կարևորել է հրադադարի ռեժիմի պահպանումը և ագրեսիվ հռետորիկայից հրաժարվելը. «Մենք Հայաստանին ու Ադրբեջանին կոչ ենք անում պատրաստակամություն ցուցաբերել և գնալ փոխադարձ փոխզիջման, հրաժարվել այնպիսի հռետորիկայից ու գործողություններից, որոնք կարող են մեծացնել լարվածությունը։
Երբեմն լռությունն ավելի լավ է ագրեսիվ հռետորիկայից։ Մենք կողմ ենք խաղաղ կարգավորմանը, և դա չունի այլընտրանք։ Պետք է հրաժարվել ռազմական գործողություններից ու արմատական հայտարարություններից, թշնամությունից ու ատելությունից։ ԵՄ-ն հուսով է, որ ԵԱՀԿ Մինսկի խմբի համանախագահող երկրների ջանքերը խաղաղության բազա կդառնան»։
