Ամռան տապին հաճախ ենք հանդիպում բացօթա դեկորատիվ ջրավազաններում լողացող երեխաների, ծարավը հագեցնող շների: Ջրավազանների ջուրը օրեր շարունակ չի փոխվում, անգամ եթե դրանց մեջ տեսանելի են տարատեսակ իրեր, աղբ:
«Առաջին լրատվական»-ի հետ զրույցում ԱՆ աշխատակազմի Առողջապահական պետական տեսչության հիգիենայի բաժնի գլխավոր մասնագետ Սիլվա Սևոյանն ասաց, որ ամեն ջրում չէ, որ պետք է լողալ. «Բացօթյա ջրավազանները դեկորատիվ բնույթ են կրում և քաղաքում որոշակի միկրոկլիմա ստեղծում, ջրավազաններում ջուրը չի ախտահանվում, ինչն էլ նպաստում է տարբեր հիվանդություններ հարուցող մանրէների արագ բազմացմանը: Ջրավազանում լողալով՝ կարող են ձեռք բերել ոչ միայն մաշկային-սնկային, այլև աղեստամոքսային հիվանդություններ»,- մանրամասնեց նա՝ հորդորելով, որ ծնողները թույլ չտան իրենց երեխաներին արհեստական ջրավազաններում լողալ:
Սիլվա Սևոյանը նաև կոչ արեց ոստիկանությանը` խստացնել հսկողությունը և արգելել մարդկանց լողալ դրա համար չնախատեսված վայրերում. «Պետք է նաև այդ ջրավազանների մոտ լինեն ցուցանակներ, որտեղ գրված կլինեն, որ լողալն արգելվում է»,- նշեց նա:
Մեր հարցին, թե ստուգումներ տվյալ ջրավազաններում իրականացվում են, Սիլվա Սևոյանը պատասխանեց, որ ոչ, փոխարենը նշեց, որ տեսչական ստուգումներ են անցկացվում սպորտային, առողջապահական լողավազաններում՝ բաց և փակ, նա շեշետեց, որ չի բացառվում նաև, որ այս լողավազաններում ևս առողջությանը վնասող ռիսկեր լինեն: Նա ընդգծեց, որ ստուգումներ են իրականացվում 70 մլն դրամ շրջանառությունը գերազանցող լողավազանային ծառայություններ առաջարկող ընկերություններում:
Հարցին, թե այս տարի իրականացվել են տեսչական ստուգումներ, մասնագետը պատասխանեց, որ դրանք ընթացքի մեջ են: Ստուգումներ են իրականացվում նաև Ջրաշխարհում. «Լաբորատոր ստուգումների արդյունքները պարզ կլինեն մյուս շաբաթ»,- շեշտեց նա: Սիլվա Սևոյանը մանրամասնեց, որ խախտում արձանագրելու դեպքում սահմանված է վարչական տույժ ՝ 50 -120 հազար դրամի շրջանակում:
