Հնդիկ ուսանողուհուն բռնաբարելու մեջ մեղադրվող ավտոբուսի վարորդ Ռամ Սինգհը Նյու Դելիի Տիխար բանտում կախվել է իր հագուստից պատրաստված պարանով,- հաղորդում է Reuters-ը՝ հղում անելով ոստիկանության ներկայացուցչին:
Agence France-Presse-ը, հղում անելով ոստիկանական բարձրաստիճան պաշտոնյային, հայտնում է, որ Սինգհը ինքնասպան է եղել մարտի 11-ին մենախցում:
Գործակալության մեկ այլ աղբյուրի հաղորդմամբ՝ բանտապահները փորձել են փրկել տղամարդուն, սակայն չեն կարողացել:
Սինգհը, ինչպես նաև գործով անցնող մյուս անձինք, գտնվել են հսկողության տակ՝ նպատակ ունենալով կանխարգելել վերջիններիս ինքնասպանության փորձերը:
Մեղադրյալի մարմինը տարվել է Deen Dayal Upadhyay-ի պետական հիվանդանոց: Նրա եղբորը՝ Ռամա Սինգհ Մուկեշին, որը անցնում է նույն գործով, հաղորդել են եղբոր մահվան մասին:
Սպանվածի փաստաբանը, ինչպես հաղորդում է Associated Press-ը, հայտարարել է, որ մեղադրյալի մահվան պատճառ են դարձել ոստիկանների գործողությունները:
Ավելի վաղ գործով անցնողների փաստաբանները պնդում էին, որ իրենց պաշտպանյալներին բանտում կտտանքների են ենթարկում:
Ռամ Սինգհը եղել է 23-ամյա ուսանողուհու բռնաբարության գործով գլխավոր մեղադրյալը:
Տղամարդն ու նրա 4 հանցակիցները մեղադրվում էին բռնաբարության, սպանության ու առևանգման մեջ: Նրանց մահապատիժ է սպառնում:
