Էլեկտրաէներգիայի սակագնի թանկացման դեմ պայքարի համակարգող խմբի անդամ Նարեկ Այվազյանը այսօր «Ֆեյսբուքի» իր էջում տեղադրել էր քաղաքի տարբեր հատվածներում իր դիմանկարով վիրավորանքներ պարունակող լուսանկարը. «Փաստորեն, այնքան եմ նեղացրել ոմանց, որ անձնական հարթություն են իջել ու քաղաքում տարածում են իմ նկարն ու պիտակավորումը։ Օպեռ, Ամերիկայի ագենտ, գռանտակեր, կագեբեյշնիկ, իշխանության մարդ ու և այլն, անվանարկող զրույցներ եղել էին, իսկ սա նորություն է»։
Նարեկ Այվազյանն «Առաջին լրատվական»-ի հետ զրույցում նշեց, որ որևէ մեկին չի կասկածում այս պահին. «Չգիտեմ՝ ով կարող է նման բան գրել, սա իշխանությունների՞ կողմից արված կլինի, թե՞ ատիվիստների, թե՞ այլ հատուկ տեղերից՝ չեմ կարող ասել»,- նշեց նա։
Արդյոք ակտիվիստը կասկածո՞ւմ է շարժման մյուս թևին նման քայլ անելու մեջ, Ն. Այվազյանը պատասխանեց, որ ինքը շատ լավ հարաբերություններ է փորձում պահել բոլորի հետ, սակայն խոստովանեց, որ միշտ չէ, որ դա ստացվում է, որովհետև գործընթացների վերաբերյալ տարբեր կարծիքներ ունեն. «Անձնական առումով լավ հարաբերություններ եմ փորձում պահպանել, և չեմ կարծում, որ իրենց միջից կլինեն մարդիկ, որ նման բան կկազմակերպեն»,- հավելեց Նարեկ Այվազյանը։
Նա նշեց, որ իր նկարները քաղաքում ինքն անձամբ չի տեսել, իր ընկերներից մեկն է նկարել ուղարկել իրեն։
Ի դեպ, Ն. Այվազյանը ոստիկանություն չի դիմի։ «Ոմանք ասում են, որ սա իրենց գովազդ անելու միջոց է, ինչն էլի ինձ համար ծիծաղելի է»,- հավելեց նա։
«Հայազն» կուսակցության անդամ Արմեն Մկրտչյանը նույնպես իր նկարով այսպիսի պաստառ է արձանագրել։ Նա նշեց, որ փակցնողները այնքան հիմար են եղել, որ չեն նկատել տարածքում առկա տեսախցիկները. «Այնքան հիմար են եղել, որ չեն հաշվարկել այդ ամենը, կամ էլ երևի արագ որոշում են կայացրել և լավ չեն ուսումնասիրել։ Մենք գիտենք թե ինչ մեքենայով և ինչ համարանիշով են եղել, իսկ դա արդեն բավական է»,- ասաց նա։
Նա նշեց, որ դեռ չի պարզել՝ ում մեքենան է։ «Ես ոստիկանություն չեմ դիմելու, որովհետև նախևառաջ չունեմ իրավական համակարգի հանդեպ վստահություն, երկրորդ՝ շատ հնարավոր է, որ սրանց կողմից է սարքված, դիմեմ, որ իրենք իրենց հանդեպ գործողություննե՞ր իրականացնեն»,- ասաց Ա. Մկրտչյանը։
Նա նշեց, որ չի կարծում Հիմնադիր խորհրդարանը նման բան արած լինի, քանի որ ինքնասպանություն կլինի նման էժան քայլի դիմելը։
Արդյոք Դավիթ Սանասարյանն ու Արմեն Մկրտչյանը պայքարի տարբեր ուղղություննե՞ր են ընտրել։ Ա. Մկրտչյանի խոսքով՝ Դավիթ Սանասարյանն իրեն հոգեհարազատ մարդ է. «Այնպես չէ, որ մենք իրար հետ նույն կառույցում ենք կամ նույն շարժման մեջ ենք եղել, որ շարունակենք կամ ոչ։ Ես իմ կապերը խզել եմ նախաձեռնող խմբերի հետ, ինքը նոր նախաձեռնող խումբ է ձևավորել, ես էլ իրենց կողքին եղել եմ, ինչով կարողացել աջակցել եմ, բայց իրենց նոր շարժման մասին անգամ պատկերացումներ էլ չունեմ»,- ասաց նա՝ հավելելով, որ Դավիթն ազնիվ մարդ է, և չի կարծում, որ սխալ գաղափարների հետևից փորձի գնալ։
