Տավուշի մարզում սահմանային վիճակը կայունացել է, կրակոցները՝ քչացել: Սահմանամերձ Չինարի գյուղի գյուղապետ Սամվել Սողոյանն ասաց, որ վերադարձել են բնականոն կյանքին և շուտով կսկսեն հնձել արտերը:
«Այնպես չի, որ վիճակը լարված է, սա մեր բնականոն կյանքն է, մենք ոչ մի տեղ չենք փախչում կրակոցներից: Կսպասենք, կհանդարտվի, հարմար պահին նորից կսկսենք մեր աշխատանքները»,- ասաց Սողոյանը՝ հավելելով, որ նախօրեին հակառակորդի կրակոցների պատճառով վնասված գազատարը արագ վերականգնվել է, և գյուղն ապահովվել է գազամատակարարմամբ:
Այգեպարի գյուղապետ Անդրանիկ Ադինյանը ևս հաստատեց, որ առայժմ իրավիճակը հանգիստ է: Իսկ Այգեպարում գյուղատնտեսական աշխատանքների հետ կապված վտանգ չկա, քանի որ գարնանը, իրավիճակով պայմանավորված, գյուղատնտեսական աշխատանքներ, ըստ էության, չեն կատարվել, արտերը չեն ցանվել, դրա համար էլ հիմա դաշտերում աշխատանք չկա: «Ով է գարնանը բան ցանել, որ աշնանն էլ հավաքի: Գարնանը, ինչպես հայտնի է, վիճակը շատ լարված էր, ոչ ոք դաշտ չգնաց, դրա համար էլ արդեն աշնանը գնալու անհրաժեշտություն չկա»,- ասաց Ադինյանը:
Մովսեսի գյուղապետ Արարատ Ավալյանն ասաց, որ կրակոցները շարունակվել են մինչև երեկ երեկոյան, լուրջ վնասներ չեն եղել, տուժողներ՝ նույնպես: «25 տարի է՝ նույն կյանքով ենք ապրում, արտառոց բան չկա, մինչև երեկվա դրությամբ կրակոցներ են եղել, բայց հիմա չեն կրակում»,- ասաց Ավալյանը:
Ինչ վերաբերում է գյուղատնտեսական աշխատանքներին, ապա Ավալյանն ասաց, որ արտհունձը 3-4 օր է՝ սկսել են, բայց այս օրերին դադարեցրել են, քանի որ ուժեղ անձրևներ են: «Ուրիշ պատճառով մենք աշխատանքները չենք դադարեցնում: Մենք հո երևանցի չե՞նք, որ վախենք: Մենք ապրում և աշխատում ենք՝ թուրքին շան տեղ չդնելով: Կրակում են՝ պատսպարվում ենք, կրակոցները դադարում են՝ դուրս ենք գալիս աշխատանքի»,- նկատեց Ավալյանը:
Մեզ հասած տեղեկություններով՝ որոշ գյուղերում, որտեղ իսկապես հունձի հետ կապված խնդիրներ կլինեն, և գյուղացին չի կարողանա հունձքի մեքենան արտեր մտցնել, գյուղապետերը կդիմեն մարզպետարան՝ անհրաժեշտ փոխհատուցում ստանալու:
Տավուշի մարզպետը, սակայն, մեր զանգերին չպատասխանեց, որից, մասնավորապես, ցանկանում էինք պարզել, թե փոխհատուցումը ինչ տեսքով է լինելու:
