«Առաքելությունն անիրագործելի է-5» լրտեսական թրիլլերի հեղինակները ֆիլմի նկարահանումներից հատված են հրապարակել YouTube-ում, որում Թոմ Կրուզն ինքնուրույն վտանգավոր հնարք է կատարում ռազմական-տրանսպորտային ինքնաթիռում: Դերասանը 1700 մ բարձրության վրա է՝ հայտնում է korrespondent.net-ը:
Ապահովության միջոցներից օգտագործվել են միայն 2 գոտի, որոնք ամրացված են եղել Կրուզի իրանին և ինքնաթիռի ֆյուզելյաժին: Տեսախցիկը տեղադրված է եղել թևի վրա, ֆիլմի ռեժիսորից պահանջվել է 8 դուբլ՝ տեսարանը նկարահանելու համար:
Քանի որ այդ հնարքն իրական վտանգ է պարունակել դերասանի առողջության և կյանքի համար, նրան բազմիցս առաջարկել են օգտվել պրոֆեսիոնալ կասկադյորի օգնությունից, սակայն Կրուզը հրաժարվել է:
«Ես գրեթե չեմ քնել նկարահանումների նախօրեին: Եթե ինչ-որ բան այնպես չընթանար, ես չէի կարողանա ինքնաթիռ մտնել մինչ դրա վայրէջքը: Ես զգում էի, թե քամին ինչպես է խփում դեմքիս: Դա ահավոր էր»,- ասել է Թոմ Կրուզը:
Հայտնի ֆրանշիզայի 5-րդ մասի պրեմիերան կկայանա 2015թ. հուլիսի 31-ին: Ռեժիսորը Քրիստոֆեր Մաքուորին է:
