Թուրքական Anadolu լրատվական գործակալության փոխանցմամբ՝ «Արդարություն և զարգացում» կուսակցության (ԱԶԿ) նախագահ Ահմեթ Դավութօղլուն շարունակում է կոալիցիոն կառավարության ձևավորմանն ուղղված իր հանդիպումները։
Դավութօղլուն այդ նպատակով երեկ հանդիպել է «Ժողովրդա-հանրապետական» կուսակցության (ԺՀԿ) առաջնորդ Քեմալ Քըլըչդարօղլուի, իսկ այսօր՝ «Ազգայնական շարժում» կուսակցության (ԱՇԿ) նախագահ Դևլեթ Բահչելիի հետ։ Դավութօղլուի ու Բահչելիի հանդիպումը տևել է 1 ժամ և 45 րոպե։ Դրան մասնակցել են նաև երկու կուսակցությունների մի շարք ներկայացուցիչներ։
Հանդիպումից հետո կազմակերպված մամուլի ասուլիսի ժամանակ Դավութօղլուն հայտարարել է, որ ԱՇԿ-ն հրաժարվել է կոալիցիոն կառավարություն ձևավորելուց։ Դավութօղլուն ընդգծել է, որ դա չի նշանակում, թե ԱԶԿ-ն հրաժարվելու է ԱՇԿ-ի հետ բանակցելուց։ Նա խոստացել է անպայմանորեն ևս մեկ անգամ հանդիպել Բահչելիի հետ։ Դավութօղլուն չի բացառել, որ ԱՇԿ-ն կարող է յուրաքանչյուր պահի տալ իր համաձայնությունը։
Դավութօղլուն կոալիցիոն կառավարություն ձևավորելու շրջանակներում վաղը հանդիպելու է քրդամետ «Ժողովուրդների դեմոկրատական» կուսակցության (ԺԴԿ) համանախագհներ Սելահաթթին Դեմիրթաշի ու Ֆիգեն Յուքսեքդաղի հետ։
