Ռուս գործարար Գերման Ստերլիգովը բացատրել է Լեռնային Ղարաբաղ տեղափոխվելու պատճառները: Նա ասել է, որ բազմիցս իր ընտանիքի հասցեին սպառնալիքներ են հնչել՝ գրում է Lenta.rս-ն:
«Դրանք պատվիրված գործեր են: Ցանկանում են ոչնչացնել ինձ և իմ ընտանիքը: Ուստի ես փորձության չենթարկեցի ճակատագիրս և այստեղ եկա»,- ասել է նա՝ հստակեցնելով, որ «ոչնչացման շատ տարբերակներ կան՝ սպանությունից մինչև ասեղի վրա նստեցնելը»:
Ստերլիգովի խոսքով՝ ինքը նախապես ծրագրել էր մեկնել Լուգանսկ: «Ես դիտում էի նրանց ղեկավարությանը, և ինձ դուր չէր գալիս նրանց քաղաքականությունը՝ այդ կարմիր դրոշները և նման այլ բաներ»,- նշել է գործարարը:
Արդյունքում նա որոշել է բնակություն հաստատել Շուշիից 24 կմ հեռավորության վրա գտնվող Շիրլանում: «Ղարաբաղը ռուսական քաղաքների համար բացառապես մաքուր և էժան մթերքների աղբյուր է: Այստեղ այնքան տարատեսակ մրգեր ու բանջարեղեններ կան, որոնք պետք է վերամշակել և Ռուսաստան ուղարկել: Այստեղ կարելի է արտադրել մաքուր և օգտակար հյութեր, կոմպոտներ, գինիներ. եթե Մոսկվան դրանք փորձի, հետագայում կթքի շատ քիմիական բաների վրա, որոնք այժմ այնտեղ վաճառում են»,- ընդգծել է նա:
