Հուլիսի 1-ից ուժի մեջ է մտել երկար չարչրկված «Շրջանառության հարկի մասին» օրենքը: ՓՄՁ ներկայացուցիչները երկար պայքարեցին, որպեսզի չկիրառվեր նախնական տարբերակը, որով նախատեսված էր փաստաթղթավորված աշխատել շրջանառության 1 տոկոս հարկով: Տևական բողոքի ցույցերից հետո ներառվեց այլընտրանքային տարբերակը: Այսինքն՝ ՓՄՁ ներկայացուցիչները կարող են ընտրել կամ փաստաթղթավորված 1 տոկոս շրջանառության հարկով տարբերակը, կամ չփաստաթղթավորված և 5 տոկոս շրջանառության հարկով:
«Առաջին լրատվական»-ի հետ զրույցում «Ֆիրդուս»-ի շուկայի փոքր ձեռներեցները հայտնեցին, որ իրենք թեև ընտրել են 5 տոկոս շրջանառության հարկով չփաստաթղթավորված տարբերակը, սակայն այդ 5 տոկոսն էլ է բարձր:
Հիշեցնենք, որ նոր օրենքով առաջարկվում է շրջանառության հարկ վճարողների շրջանառության տարեկան առավելագույն շեմը 58,35 մլն դրամից բարձրացնել 115 մլն դրամի:
«Փաստաթղթավորումը մեզ համար շատ բարդ պրոցես է. եթե ես գնամ մեծաքանակ առևտրի կենտրոն, ինձ ոչ ոք փաստաթուղթ չի ներկայացնի: Իմ աղջիկը, որ իմ մոտից մի հագուստ հագնի, ես ստիպված հարկ պիտի վճարեմ, դրա համար ես ընտրել եմ 5 տոկոս շրջանառության հարկի տարբերակը առանց փաստաթղթի, որը մեզ համար ևս շատ բարձր է»,- մեզ հետ զրույցում ասաց «Ֆիրդուս»-ի շուկայի փոքր ձեռներեց տիկին Մարիան:
«Ամեն դեպքում շատ վատ տարբերակ էր, օրենքը հենց դրա վրա աշխատեց, միանգամից բարձր տոկոս դրեցին, իբր մեզ համար լուծում առաջարկեցին, բայց դա ընդամենը փափուկ բարձ էր: Մեզ համար լավ կլիներ, եթե մնար այնպես, ինչպես որ կար»,- ասաց տիկինը:
Վերջինիս գործընկերները ևս իրենց դժգոհությունները ներկայացրին և նոր օրենքի, և ընդհանրապես՝ ՓՄՁ-ի վատ վիճակի մասին:
Ավելին՝ տեսանյութում:
