«Դատապարտում եմ տեղի ունեցածը, անհամաչափ ուժի կիրառումը, այդ թվում լրագրողների նկատմամբ բռնությունները։ Կարծում եմ՝ իշխանությունները դրանով շատ մեծ վնաս հասցրին ՀՀ-ին, հստայական բարդություններ ստեղծեցին ԵՄ-ի և քաղաքակիրթ աշխարհի հետ մեր հարաբերություններում»,-Ազատության հրապարակում մեկնարկած համախմբման արշավի ժամանակ ասաց Տարածաշրջանային հետազոտությունների կենտրոնի առաջատար փորձագետ, 1992-95 թթ ՀՀ նախագահի հատուկ հանձնարարություններով դեսպան Դավիթ Շահնազարյանը՝ անդրադառնալով լուսադեմին ոստիկանության կողմից կիրառված բռնություններին։
Նա նշեց, որ ակնհայտ էր, որ չկար կառավարելիության, կազմակերպչական որևէ լուրջ քայլեր չէին արվել, ըստ էության դա սպոնտան, անկառավարելի միջոցառում էր։
«Մենք պետք է հասկանանք, որ բոլոր խնդիրների լուծումը ունի մեկ բանալի. դա պայքարն է մեր ինքնիշխանության, պետականության համար։ Ռուսաստանը շարունակում է շահագործել, ֆինանսապես քամել Հայաստանը և այն, ինչի դեմ ըստ էության պայքարում է այս հասարակությունը, բայց չի ասում այդ մասին, դա Ռուսաստանի համակարգային կոռուպցիոն համակարգն է»,-ասաց Դավիթ Շահնազարյանը «Առաջին լրատվական»-ի հետ զրույցում։