Ոստիկանության Արաբկիրի բաժնից «Կարին» համույթի ղեկավար Գագիկ Գինոսյանին տեղափոխել են նարկոդիսպանսեր՝ հետազոտման համար: Բաժնում գտնվող Երևանի ավագանու «Բարև Երևան» ընդդիմադիր խմբակցության անդամ Անահիտ Բախշյանն «Առաջին լրատվական»-ի հետ զրույցում ասաց, որ Գինոսյանը ոստիկաններին ասել է, որ նման հետազոտման անհրաժեշտություն չկա, սակայն ոստիկանները համատռել են, թե այդ հետազոտությունը պարտադիր է բոլորի համար:
Բախշյանը նաև փոխանցեց, որ բերման ենթարկված աղջիկներին ու տղաներին առանձնացրել են: Տղաների մեծ մասին տեղափոխում են կրկին նարկոդիսպանսեր և խմածություն որոշելու, իսկ նրանց, ում նկատմամբ քրեական գործեր են հարուցվել, արդեն իսկ տեղափոխում են քննչական բաժիններ:
Բախշյանի խոսքով՝ ոստիկանությունը պատրաստվում է քրեական գործ սարքել, դրա համար էլ դիմում է այդ հետազոտություններին, որ կեղծ հիմքեր գտնի ու սարքի: «Իրենց հիմքեր են հարկավոր քերական գործեր սարքելու համար: Դրա համար հիմա բոլորին համատարած ուղարկելու են նարկոդիսպանսեր ու խմածություն որոշելու: Սակայն իմ խորին համոզմամբ՝ բոլոր ոստիկաններին պետք է տանեն դիսպանսեր, քանի որ նրանց արածները, արարքները ավելի են բնորոշ նարկոտիկ ու ալկոհոլ օգտագործողների, քան այդ փայլուն ակտիվիստների, այդ թվում՝ Գագիկ Գինոսյանի պես ազնվագույն մարդու»,- մեզ հետ զրույցում ասաց Բախշյանը:
Նշենք, որ այս պահի դրությամբ ոստիկանության բաժնում բերման ենթարկված 11 անձ կա:
Հիշեցնենք, որ ընդդեմ էլեկտրաէներգիայի թանկացման կազմակերպված նստացույցը, որը երեկ երեկոյան տեղափոխվել էր Բաղրամյան պողոտայի սկզբնամաս, ցրվեց ոստիկանական բռնի գործողությունների ու ջրցան մեքենաների միջոցով: Վաղ առավոտից ոստիկանական տարբեր բաժանմունքներ բերման են ենթարկվել 237 ակտիվիստներ: Տարբեր քաղաքացիներ դիմել են հիվանդանոց՝ բուժօգնություն ստանալու համար:
Նշենք նաև, որ այս պահին բերման ենթարկվածներից շատերի նկատմամբ քրեական գործեր են հարուցվում խուլիգանության հոդվածով:
