Իսրայելցի դրուզների խումբը հարձակվել է շտապօգնության բանակային մեքենայի վրա, որը տեղի հիվանդանոց էր տեղափոխում 2 վիրավոր սիրիացիների։ Նրանցից մեկը հարձակումից հետո մահացել է: Այս մասին հայտնում է RIA Novosti-ն՝ հղում անելով տեղի ոստիկանությանը:
Սիրիայում ցեղակիցների ճակատագրով մտահոգ դրուզները բազմիցս Իսրայելի իշխանություններին մեղադրել են, որ նրանք բուժման են ընդունում «Ջեբհաթ ան-Նուսրա» արմատական իսլամիստական խմբավորման գրոհայիններին, որի հարձակման գծում են հարևան երկրի դրուզների գյուղերը:
«Գոլանի բարձունքներում գյուղերի բնակիչները հարձակվել են վիրավորների վրա, որոնք եղել են բանակային ավտոմեքենայում… Արձանագրվել է տուժածներից մեկի մահվան փաստը: Երկրորդի վիճակը ծանր է»,- ասվում է իրավապահ մարմինների հաղորդագրության մեջ:
Դեպքի վայրում հարյուրավոր տեղի բնակիչներ կան, ժամանել են ոստիկանության մեծաթիվ ուժեր: Մի քանի օրում սա վիրավոր սիրիացիների տեղափոխող շտապօգնության մեքենայի վրա հարձակման արդեն երկրորդ դեպքն է: Առաջին անգամ, տեղի ԶԼՄ-ների հաղորդմամբ, զինվորականներին հաջողվել է հարձակվողներից հեռացնել ավտոմեքենան:
Իսրայելի վարչապետ Բենիամին Նեթանյահուն հանդես է եկել հատուկ հայտարարությամբ, որով անթույլատրելի է համարել «օրենքն իրենց ձեռքը վերցնելու և զինվորականներին իրենց պարտականությունները կատարելուն խանգարելու» փորձերը: Նա խոստացել է մեղավորներին պատասխանատվության ենթարկել:
