ՀՔԱ Վանաձորի գրասենյակի ղեկավար, իրավապաշտպան Արթուր Սաքունցը, անդրադառնալով ոստիկանության կողմից լուսադեմին նստացույցի մասնակիցների նկատմամբ կիրառված աննախադեպ բռնություններին, «Առաջին լրատվական»-ի հետ զրույցում նշեց, որ մինչև ժամը 22։00-ը, ապա ուշ գիշերին բացարձակապես չէր զգացվում, որ բռնություն գործադրելու միտում կա, և ինձ համար շատ անսպասելի էր առավոտվա միանգամից հարձակումը։
«Այսինքն՝ պետք է արձանագրել, որ ամեն ինչ կախված է հրամանից, թե ինչպիսի հրաման են տալիս, բնականաբար, հրամանի բնույթից կախված է նաև՝ կա՞ն համապատասխան հրաման կատարողներ, թե՞ ոչ։ Այդ առումով ոստիկանության համակարգը ամբողջովին ձերբազատված չէ վայրենիներից, որոնք սեփական քաղաքացիների նկատմամբ մշտապես օգտագործվում են որպես մամլիչներ։ Ինձ համար հանելուկային է մնում մի բան՝ եթե թույլ չէին տալու կամ նման կերպ էին վարվելու, ապա ինչո՞ւ թույլ տվեցին, որ մարդիկ գնան Բաղրամյան պողոտայի սկիզբը, այսինքն՝ եթե ի սկզբանե կար չընդունելու կամ արգելելու միտում, կարող էին ընդհանրապես չթողնել, որպեսզի Ազատության հրապարակից դուրս գան և բարձրանան Բաղրամյան»,- ասաց իրավապաշտպանը։
Նրա խոսքով՝ ինչ-որ բան դեռևս անհասկանալի է իրավիճակի փոփոխման հետ կապված, բայց այն, որ այլանդակություն կատարվեց՝ ակնհայտ է։
«Իշխանությունը երբ տեսնում է, որ կան որոշակի վտանգներ, բացարձակապես որևէ օրենքի վրա թքած ունի և կարող է բռնություն կիրառել օպերատորների և լրագրողների նկատմամբ»,- ասաց Ա. Սաքունցը։
Նրա դիտարկմամբ՝ 2013 թվականի դեկտեմբերի 2-ից հետո ոստիկանության բռնությունները ավելի են դաժանացել զանգվածային միջոցառումների ժամանակ։
«Մարդկանց թիվն այնքան չէր, որ կարելի էր ջրցան մեքենա կիրառել։ Եթե մարդիկ նստած էին, կարող էին մոտենալ և կոպիտ ասած՝ մեկ առ մեկ վերցնել, բայց ուժի աննախադեպ կիրառում փոքրաթիվ մարդկանց նկատմամբ…
Մինչ այդ պահը ոստիկանության պահվածքը, նույն Օսիպյանի պահվածքը բոլորովին այլ բնույթի էր՝ երկխոսություն, զրույցներ և այլն, չկար բռնության որևէ նշույլ, բայց ինչ-որ իրավիճակ փոխվեց. դա Կրեմլում որոշեցին, թե Բաղրամյան 26-ում կամ Երանոսյանի կաբինետում՝ պարզ չէ։ Իշխանությունն ամենադաժան կերպով ուժ կիրառեց երկրի ներկայով և ապագայով մտահոգված ազնիվ երիտասարդների նկատմամբ։ Սա մեզ անընդհատ ստիպում է ավելի խելացի դառնալ»,- հավելեց նա։
