Հռոմի պապ Ֆրանցիսկոսը կիրակի Թուրինում քննադատել է գերտերություններին 20-րդ դարի կոտորածները կանխելու նպատակով ոչինչ չձեռնարկելու համար։ Նա այդ կերպ ըմբռնում է հայտնել երիտասարդներին առ այն, թե ինչու են նրանք դժվարանում վստահել աշխարհին։ Այս մասին գրում է Time-ը:
Հովվապետն անդրադարձել է Հայոց ցեղասպանությանը, Երկրորդ համաշխարհային պատերազմին, ինչպես նաև ստալինյան Ռուսաստանի գուլագներին՝ դատապարտելով գերտերություններին այն դեպքում, երբ բոլոր վկայությունները խոսում էին, որ Եվրոպայում Երկրորդ համաշխարհային պատերազմի տարիներին հրեաները, քրիստոնյաները, միասեռականները և այլք ուղարկվում էին մահվան ճամբարներ:
«Գերտերությունները ունեին լուսանկարներ երկաթուղիներից, որոնցով գնացքները գնում էին Աուշվից՝ հրեաներին, քրիստոնյաներին, միասեռականներին, բոլորին սպանելու: Ինչո՞ւ նրանք չռմբակոծեցին այդ երկաթուղիները»,- հարցադրում է արել նա:
Ողբալով աշխարհի խաղացողների ցինիզմը 1930-40-ականներին նա ասել է, որ «գերտերությունները Եվրոպան մասնատել են տորթի նման»։
Նա խոսել է նաև Հայոց ցեղասպանության մասին՝ այն անվանելով «Հայաստանի մեծ ողբերգություն»։
«Նախորդ դարում այդքան շատ՝ միլիոնավոր հայեր են մահացել: Բայց որտե՞ղ էին գերտերություններն այդ ժամանակ: Նրանք այլ ուղղությամբ էին նայում»,- ասել է Հռոմի պապը։
Հովվապետն ասել է երիտասարդներին, որ այսօր աշխարհում ամեն ինչ արվում է փողի համար: Նա քննադատել է խաղաղության քարոզի քողի ներքո զենք արտադրողներին և վաճառողներին։
