Դերասանուհի Քեյթ Ուինսլեթը Նյու Յորքում ներկա է եղել «Փոքրիկ քաոս» ֆիլմի պրեմիերային: Նրա արտաքինը գրավել է հանրությանն ու լրագրողներին: 39-ամյա դերասանուհին, որը մեկուկես տարի առաջ է տղա ունեցել, կարողացել է նիհարել ծննդաբերությունից հետո: Փոխվել է նաև դերասանուհու դեմքը՝ հայտնում է Daily Mail-ը:
Լրագրողները ենթադրել են, որ դերասանուհին հոնքերի գիծը կարողացել է բարձրացնել բոտոքսի ներարկումների միջոցով: Սակայն, ինչպես հիշեցնում է պարբերականը, Ուինսլեթը միշտ դեմ է եղել պլաստիկ վիրաբուժությանը և նման պրոցեդուրաներին: Նա նաև ավելի վաղ հայտարարել է, որ չի ցանկանում նիհարել իր երրորդ երեխայի ծնվելուց հետո:
Հարցազրույցներից մեկում դերասանուհին խոստովանել է, որ երբեք չի հավատացել ծննդաբերությունից հետո 12 շաբաթում իրեն կարգի բերելու հնարավորությանը:
Դերասանուհու խոսքով՝ ինքը չէր սպասում, որ 3 երեխաների ծննդից հետո կկարողանա պահպանել կատարյալ կազմվածքը:
Ինչ վերաբերում է կոսմետոլոգիական պրոցեդուրաներին՝ մասնագետները կարծում են, որ դերասանուհին, այնուամենայնիվ, փոխել է կարծիքը դրանց վերաբերյալ: Պլաստիկ վիրաբուժությանը նվիրված Transform Cosmetic Surgery կայքի ներկայացուցիչ Մարկ Նորֆոլկը նշել է. «Ամենից շատ նկատելի է նրա հարթ, առանց կնճիռների ճակատը. դա վկայում է բոտոքսի կիրառության մասին: Եթե ուշադիր նայեք նրա վերջին լուսանկարներին, կնկատեք, որ նրա ձախ հոնքը մի քիչ բարձր է աջից: Դա բոտոքսի կիրառության դասական վկայություն է: Բայց մի շաբաթ հետո դա կանցնի»:
Դերասանուհու ներկայացուցիչները չեն պատասխանել լրագրողների հարցերին այն մասին, թե նա ինչպես է փոխել արտաքինը:
