«Առաջին լրատվական»-ի զրուցակիցն է «Ժառանգություն» խմբակցության քարտուղար Թևան Պողոսյանը։
– Պարոն Պողոսյան, Դուք Էդմոն Մարուքյանի հետ միասին պատրաստվում եք նոր կուսակցությո՞ւն ստեղծել:
– Ուղղակի խոսակցություն է եղել, դեռ որևէ նախաձեռնություն չկա: Գաղափարներ են, թող լինեն: Հայ հանրության մոտ ինչքան շատ նոր գաղափարներ լինեն, այնքան ուրախ կլինեմ:
– Է. Մարուքյանը չէր բացառել, որ դուք նոր ստեղծվող այդ կուսակցությունում կլինեք:
– Ես էլ կյանքում որևէ բան չեմ բացառում, բայց միշտ ասել եմ, որ ինքս կուսակցական լինելուն այնքան էլ կողմնակից չեմ: Եթե լինեի՝ տարբեր կուսակցություններից հրավերներ եղել են, որ անդամակցեմ, բայց երբևէ չեմ արել: Ընդհանրապես ինձ հետաքրքրում է այն ուղղությունը, որ Հայաստանն ունենա իր արևմտյան կամ եվրոպական ուղղության զարգացման խնդիրը: Միշտ ասել եմ՝ լինի ՍՊԸ, կուսակցություն, թե հասարակական կազմակերպություն, որը կնպաստի Հայաստանի՝ եվրոպական ինտեգրմանը, ես կլինեմ նրանց կողքին և կաջակցեմ:
– Իսկ այդ ուղղությունը Հայաստանի համար կարևո՞ր է:
– Անպայման: Ես հավատում եմ, որ Հայաստանի երկարատև շահերը համընկնում են եվրոպական ինտեգրման ուղուն, որ Հայաստանում կզարգանան ժողովրդավարությունը, ազատ շուկայական հարաբերությունները, խոսքի իրավունքը: Եվ Հայաստանը կդառնա բարեկեցիկ երկրներից մեկը:
– Չե՞ք կարծում, որ Հայաստանի՝ Եվրասիական տնտեսական միությանն անդամակցելուց հետո արդեն եվրաինտեգրման մասին խոսելը անիմաստ է դառնում:
– Ես ինքս չեմ հավատում այդ նախագծին: Այնպես որ՝ ինձ համար իմաստ ունի եվրաինտեգրման ուղղության շարժումը, իմաստից զուրկ է ԵՏՄ-ին անդամ լինելը:
