Թուրք ազգայնականների Yeni Çağ թերթի փոխանցմամբ, ԵԽԽՎ գարնանային նստաշրջանում Էրդողանի ելույթը մեծ դժգոհություն է առաջացրել թուրք ազգայնականների շրջանում:
Նրանք նշում են, որ իր ելույթի ժամանակ, խոսելով Թուրքիայում զինադադարի հաստատման վերաբերյալ Իմրալը կղզում ցմահ բանտարկություն կրող քուրդ առաջնորդ Աբդուլլահ Օջալանի հետ տարված բանակցություններից, Էրդողանը գործածել է «Պետության ղեկավարը իշխանությունն է» արտահայտությունը:
Դրանով նա թուրք ազգայնականներին հիշեցրել է 1643-1715 թվականներին` 72 տարի շարունակ, Ֆրանսիայում թագավորած Լյուդովիկոս XIV-ին:
Սակայն ի տարբերություն Ֆրանսիայի 31-րդ թագավոր Լյուդովիկոս XIV-ի` Էրդողանը Թուրքիայում իշխում է ընդամենը 8 տարի: Հունիսի 12-ին Թուրքիայում կայանալու են խորհրդարանական ընտրություններ, և Էրդողանի գլխավորած «Արդարություն և զարգացում» կուսակցությունը (ԱԶԿ) հնարավորություն ունի 3-րդ անգամ անընդմեջ հաղթելու դրանցում:
Էրդողանը չի էլ թաքցնում, որ պատրաստվում է դրանից հետո անցում կատարել երկրի կառավարման «նախագահական» համակարգին (զգալիորեն կընդլայնվեն նախագահի լիազորությունները) և դառնալ երկրի նախագահ: Նա, իրենից բացի, որևէ այլ ուժի չի ճանաչում և չի ընդունում, ինչը հարիր չէ ժամանակակից ժողովրդավարական երկրներին:
Հիշեցնենք, որ Լյուդովիկոս XIV-ին վերագրում են «Պետությունը ես եմ» արտահայտությունը: Նա նաև հանդիսանում էր թագավորի աստվածային իրավունքների կատաղի կողմնակից և Եվրոպայի պատմության ընթացքում ամենատևական ժամկետով իշխած միապետ:
Ի դեպ, WikiLeaks-յան հրապարակումներում Էրդողանը բնութագրվում է որպես չափազանց ինքնահավան և գոռոզ մարդ:
