ՌԴ ԱԳՆ-ի պաշտոնական կայքում հրապարակվել է «2014 թվականին ՌԴ ԱԳՆ-ի գործունեության հիմնական արդյունքների և միջնաժամկետ հեռանկարում առաջադրանքների մասին» փաստաթուղթը, որը բաղկացած է 106 էջից:
Փաստաթղթում անդրադարձ է կատարված նաև Ղարաբաղյան հակամարտության կարգավորման հիմնախնդրին։
«Ղարաբաղյան հակամարտության գոտու շրջանում իրավիճակի կտրուկ սրացման ժամանակաշրջանում առանցքային կայունացնող դեր խաղաց Հայաստանի նախագահ Սերժ Սարգսյանի, Ադրբեջանի նախագահ Իլհամ Ալիևի ու Ռուսաստանի նախագահ Վլադիմիր Պուտինի եռակողմ հանդիպումը (Սոչի, 10.08.2014), որի արդյունքներով անդրկովկասյան հանրապետությունների առաջնորդները հաստատեցին հակամարտության խաղաղ կարգավորմանը հավատարմությունը:
Տարվա ընթացքում ԵԱՀԿ Մինսկի խմբի համանախագահները (Ռուսաստան, ԱՄՆ և Ֆրանսիա) 5 հանդիպում են անցկացրել երկու երկրների ղեկավարների հետ, մի շարք խորհրդակցություններ՝ արտգործնախարարների հետ, շփումներ են պահպանել Լեռնային Ղարաբաղի իշխանությունների հետ:
ԵԱՀԿ անդամ երկրների արտգործնախարարների նիստում (Բազել, 2014 թվականի դեկտեմբեր) միջնորդ երկրների պատվիրակությունների ղեկավարները հայտարարություն ընդունեցին՝ հակամարտող կողմերին կոչ անելով հրաժարվել ուժի կիրառումից՝ ի շահ երկարաժամկետ կարգավորման:
Ղարաբաղյան կարգավորման գործընթացի շրջանակներում տարվող միջնորդական ջանքերը՝ ուղղված դիմակայության գոտում լարվածության երկարաժամկետ նվազեցմանը, փոխընդունելի փոխզիջմերի որոնմանը, և Հայաստանի ու Ադրբեջանի ղեկավարությունների հակվածության ամրապնդումը ունակ են հանգեցնել բազմամյա հակամարտության խաղաղ կարգավորմանը»,- ասված է փաստաթղթում:
Փաստաթղթում նաև նշված է, որ Ռուսաստանը մտադիր է զարգացնել Հայաստանի հետ ռազմավարական գործընկերությունն ու դաշնակցային փոխգործակցությունը (հաշվի առնելով, որ նա ԵՏՄ-ի ու ՀԱՊԿ-ի անդամ է), ինչպես նաև մտադիր է ամրապնդել Ադրբեջանի հետ հարաբերությունները՝ ռազմավարական գործընկերության դիրքերից:
