Ռուսական Ria Novosti լրատվական գործակալության փոխանցմամբ՝ Ռուսաստանի արտգործնախարար Սերգեյ Լավրովը հայտարարել է, որ շուտով կիրականացվի Իրանին С-300 զենիթա-հրթիռային համալիրների (ԶՀՀ) մատակարարումը, ընթանում է նախապատրաստություն:
«Կատարվում է մատակարարման նախապատրաստություն, և դա շուտով կիրականացվի»,- ասել է նա:
Անդրադառնալով Իրանի միջուկային ծրագրի կարգավորման խնդրին՝ Լավրովը հայտարարել է, որ «վեցյակի» ու Իրանի միջև համաձայնագրի ստորագրման բանալի կարող են ծառայել բազային պայմանավորվածությունները. «Մենք (Ռուսաստան, Իրան և Չինաստան) ընդհանուր կարծիք ունենք, որ դրանց (բանակցությունների) հաջող զարգացման բանալին բազային պայմանավորվածություններն են, որոնց կողմերը հասել են Լոզանում»:
Հիշեցնենք, որ С-300-ների 5 դիվիզիոնի մատակարարման մասին պայմանագիրը Ռուսաստանի և Իրանի միջև կնքվել է 2007 թվականի վերջին: Գործարքը գնահատվել էր 800 միլիոն դոլար:
Սակայն այն բանից հետո, ինչ ՄԱԿ-ի ԱԽ-ն 2010 թվականի հունիսին ընդունեց Իրանին սպառազինություն մատակարարելը սահմանափակող թիվ 1929 բանաձևը, Ռուսաստանի նախագահ Դմիտրի Մեդվեդևը 2010 թվականի սեպտեմբերի 22-ին չեղյալ հայտարարեց Իրանին С-300-ների մատակարարման մասին պայմանագիրը՝ չնայած նրան, որ իրանական կողմն արդեն 167 միլիոն դոլարի կանխավճար էր տվել:
Ռուսաստանի նախագահ Վլադիմիր Պուտինն Իրանին C-300 համալիրների մատակարարման վրա դրած արգելքը վերացրել է ապրիլի 13-ին: