Ռուսական Ria Novosti լրատվական գործակալության փոխանցմամբ՝ Թուրքիայի՝ Եվրամիության հարցերով պետնախարար Վոլքան Բոզքըրն անընդունելի է անվանել Անկարայի համար Եվրոպական խորհրդարանի տարեկան զեկույցի այն կետերը, որոնք նվիրված են ԵՄ-ին Թուրքիայի անդամակցությանը գնահատական տալուն:
«Եթե զեկույցի վերջնական տեքստում լինեն այնպիսի կետեր, ինչպիսին 1915 թվականի դեպքերի վերաբերյալ 2015 թվականի ապրիլի 15-ին Եվրոպական խորհրդարանի որոշումն էր, «Քրդստանի աշխատավորական» կուսակցությունը (PKK) ահաբեկչական կազմակերպությունների ցանկից հանելը, մինչև ԵՄ-ին Թուրքիայի անդամակցելը ֆինանսական օգնությունը սառեցնելու կոչը, ԵՄ-ին անդամակցելու շուրջ բանակցություններում նոր գլուխներ չբացելու կոչը, ապա Անկարայի համար նման զեկույցն անընդունելի կլինի»:
Ընդգծվում է, որ Վոլքան Բոզքըրն իր այս նամակը հղել է Եվրոպական խորհրդարանի ղեկավար Մարտին Շուլցին, ԵՄ-ի դիվանագիտության ղեկավար Ֆեդերիկա Մոգերինիին, ԵՄ-ի ընդլայնման ու հարևանության քաղաքականության հարցերով հանձնակատար Յոհաննես Հահնին, ինչպես նաև Եվրոպական խորհրդարանի խմբակցությունների ղեկավարներին:
Բոզքըրը եվրոպացի քաղաքական գործիչներին զգուշացրել է նաև այն մասին, որ զեկույցը չպետք է ունենա միակողմանի բովանդակություն, որը կարող է բացասաբար ազդել Կիպրոսի կարգավորման շուրջ ընթացող բանակցությունների վրա:
Ակնկալվում է, որ զեկույցը հրապարակվելու է հունիսին:
