Հյուսիսային Կորեայի միջուկային ուժերի ամրապնդումը կարող է կանխել ԱՄՆ-ի հետ պատերազմը, որի պատճառը կարող է լինել երկու պետությունների միջև վստահության բացակայությունը։ Այս մասին ասվում է Հյուսիսային Կորեայի ԱԳՆ հայտարարության մեջ՝ փոխանցում է rosbalt.ru-ն:
Փխենյանում այն կարծիքին են, որ Վաշինգտոնը լրջորեն պատրաստվում է Հյուսիսային Կորեայի հետ պատերազմին և մտադիր է Հարավային Կորեայում տեղադրել THAAD հակահրթիռային համալիր:
Բացի այդ, Հյուսիսային Կորեայի կառավարությունը հերքել է Վաշինգտոնի այն հայտարարությունը, թե Փխենյանը հրաժարվում է միջուկային հիմնախնդրի հարցով բանակցություններից: Հյուսիսային Կորեայի ԱԳՆ-ն համարում է, որ երկխոսությանը խոչընդոտում է ԱՄՆ-ը` առաջ քաշելով բազմաթիվ նախապայմաններ:
Ավելի վաղ ԱՄՆ պետքարտուղար Ջոն Քերին մեղադրել էր Հյուսիսային Կորեային ՄԱԿ-ի բանաձևին չհետևելու համար և սպառնացել էր ի պատասխան՝ ուժեղացնել ԱՄՆ-ի կողմից կիրառվող պատժամիջոցները: Այս հայտարարությունը հնչել է մայիսի 26-ին՝ ԱՄՆ-ի, Ճապոնիայի և Հարավային Կորեայի ներկայացուցիչների խորհրդակցությունների արդյունքներով։ Կողմերը համաձայնության են եկել Հյուսիսային Կորեայի վրա ճնշումները ուժեղացնելու հարցում, որպեսզի նրան ստիպեն վերսկսել վեցակողմ բանակցությունները:
