2016թ. ԵՄ-ն մտադիր է 9,5 մլրդ եվրո ծախսել արտաքին ճգնաժամերին արձագանքելու համար՝ ներառյալ Ուկրաինայում: TASS-ի հաղորդմամբ՝ այս մասին Եվրահանձնաժողովում ճեպազրույցի ժանանակ հայտարարել է բյուջեի և կադրերի հարցերով եվրահանձնակատար Կրիստալինա Գեորգիևան:
«2016թ. ԵՄ-ն մտադիր է 9,5 մլրդ եվրո ծախսել արտաքին ճգնաժամերին արձագանքելու համար՝ ներառյալ Սիրիան, Իրաքը և Ուկրաինան»,- ասել է նա:
Եվրահանձնաժողովի առաջարկների համաձայն՝ ԵՄ բյուջեի ծախսային մասը 2016թ. կկազմի 143,5 մլրդ եվրո:
Գեորգիևայի խոսքով՝ 66,6 մլրդ եվրո ծրագրվում է հատկացնել տնտեսական աճի և զբաղվածության խթանմանը: Բացի դրանից՝ Եվրահանձնաժողովը մտադիր է ինովացիաներին և Horizon-2020 ծրագրի շրջանակներում կատարվող ուսումնասիրությանը հատկացնել 10 մլրդ եվրո, մինչև 2015թ. այդ ծրագրին հատկացվել է 11,6 մլրդ եվրո:
Եվրահանձնաժողովը նախատեսում է 42,86 մլրդ եվրո ծախսել Ընդհանուր ագրարային քաղաքականության շրջանակներում գյուղատնտեսական արտադրողներին աջակցության ծրագրի վրա:
Բացի դրանից՝ Եվրահանձնաժողովն առաջարկում է 833 մլն եվրո հատկացնել միգրացիոն խնդիրների լուծմանը:
ԵՄ բյուջեի պարամետրերը դեռ պետք է հաստատեն Եվրախորհրդարանն ու ԵՄ Խորհուրդը: Բյուջեն պետք է ընդունվի մինչև 2015թ. վերջ:
