Սիրիայի ղեկավարությունն այլ պետությունների կողմից այդ երկրում կռվող զինված խմբավորումներին ցանկացած օգնություն կորակի որպես ագրեսիա: «Ալ-Մայադին» հեռուստաալիքի հաղորդմամբ՝ այս մասին հայտարարել է Սիրիայի ԱԳՆ ղեկավարի տեղակալ Ֆեյսալ Միքդադը:
Ավելի վաղ Associated Press-ը, հղում անելով Թուրքիայի ԱԳՆ ղեկավար Մևլութ Չավուշօղլուին, հայտնել է, որ Անկարան և Վաշինգտոնը ձեռք են բերել սկզբունքային պայմանավորվածություն «ԴԱԻՇ-ի (Իրաքի և Շամի իսլամական պետություն) դեմ պայքարի համար պատրաստված սիրիական չափավոր» ընդդիմությանը օդից պաշտպանելու վերաբերյալ:
«Ցանկացած պետություն, որը մտադիր է աջակցել զինված ահաբեկչական խմբավորումներին, կհամարավի ագրեսոր Սիրիայի դեմ»,- ասել է Միքդադը՝ ի պատասխան Չավուշօղլուի հայտարարությանը:
Միքդադի խոսքով՝ Անկարայի կողմից նման հայտարարությունները հաստատում են, որ Թուրքիան մտադիր է «ուղղակի ֆինանսական և ռազմական աջակցություն ցուցաբերել Սիրիայում կռվող ահաբեկչական խմբավորումներին», ինչը կերկարաձգի ճգնաժամն ու մեծ թվով խաղաղ քաղաքացիների մահվան պատճառ կդառնա:
