Ոստիկանապետ Վովա Գասպարյանն այսօր աշխատանքային այց է կատարել Շիրակի մարզ: Թե որն է եղել այդ այցի նպատակը՝ պարզ չէ, իսկ Վովա Գասպարյանի հրապարակային հայտարարություններն այդ մարզում վերաբերել են մեկ այլ մարզի կամ ավելի ճիշտ մարզպետի՝ Սուրիկ Խաչատրյանին և նրա որդուն, որոնք հայտնվել են հերթական սկանդալային պատմության մեջ։
Այս սկանդալում անհարմար վիճակում հայտնված կառույցներից մեկն էլ ոստիկանությունն էր, որը օրեր շարունակ չէր կարողանում կատարել Սուրիկ Խաչատրյանի որդուն բերման ենթարկելու քննչական մարմնի որոշումը: Հետո Խաչատրյանի որդին ներկայացավ ինքնակամ: Ըստ որում, հետաքրքրականը այն էր, որ դրան գրեթե զուգահեռ ոստիկանություն էր այցելել Սերժ Սարգսյանն ու հայտնել իր աջակցությունը այդ կառույցին:
Վովա Գասպարյանը Գյումրիում հայտարարել է, որ Սուրիկ Խաչատրյանի որդին ինքնակամ է ներկայացել, սակայն դա էլ ըստ էության ոստիկանության աշխատանքի արդյունք է, որովհետև բոլորը գիտեն, որ հնարավոր չէ փախչել ու թաքնվել անգամ այլ երկրներում:
Ըստ էության, փաստորեն Վովա Գասպարյանը հայտարարել է, որ մարզպետի որդուն, այնուամենայնիվ, ոստիկանությունն է վերադարձրել: Գասպարյանը երևի թե փորձում է այսպիսով վերականգնել իր սասանված հեղինակությունը, ցույց տալ, որ ոստիկանությունը ոչ թե հայտնվել էր Սուրիկ Խաչատրյանի առաջ հանձնվածի կարգավիճակում, այլ տիրապետում էր իրավիճակին և գործում իրավիճակի համար հարկ եղած մեթոդներով:
Հաջողվո՞ւմ է Վովա Գասպարյանին համոզել, որ ոստիկանությունը վերահսկում էր իրավիճակը, թե՞ ոչ՝ դժվար է ասել: Համենայնդեպս, իրավիճակն ինքնին չափազանց խոսուն էր, և այն, որ Սուրիկ Խաչատրյանի որդին բերման է ենթարկվել ոչ թե անմիջապես, այլ մի քանի օր անց է եկել, այն էլ՝ մինչ այդ հնարավորություն ունենալով հեռանալ հանրապետությունից, արդեն իսկ խոսում է ամեն ինչի մասին:
Որևէ մեկի համար կասկած իսկ երևի թե չկա, որ շարքային ցանկացած քաղաքացու դեպքում ոստիկանությունը երևի թե ոչ միայն որևէ մեկին նրա ծեծելուց հետո, այլև ընթացքում և գուցե ծեծելուց առաջ նրան բերման կենթարկեր: Եվ այս տեսանկյունից, իհարկե, ոստիկանապետի, այսպես ասած, համակարգային դիրքերը իսկապես սասանված են՝ նկատի առնելով այն, որ Գասպարյանը իր պաշտոնավարման ընթացքում փորձում էր ցույց տալ, որ համակարգում իրենից վեր միայն Սերժ Սարգսյանն է, և ոստիկանության համար անպատժելիներ այլևս չկան: Ըստ որում, Գասպարյանին մի տևական ժամանակ զգալիորեն հաջողվում էր դա, և չնայած եղել են նաև, այսպես ասած, նահանջի ամիսներ, սակայն ընդհանուր առմամբ մինչև վերջին միջադեպը նա իր բարձրության վրա կարողացել է մնալ:
Սակայն վերջին սյունիքյան միջադեպը լիովին այլ պատկեր ձևավորեց, և այստեղ, իհարկե, Վովա Գասպարյանի բացատրությունների համոզիչ լինելը, մեղմ ասած, կասկածի տակ է, և Գասպարյանի համակարգային դիրքերին հասցված հարվածը ակնհայտ է։ Շիրակի մարզի հայտարարությունները կարող են մեղմել հարվածի ցավը, սակայն չեն քողարկի այն:
Ըստ որում, խնդիրը բոլորովին հասարակական հեղինակությունը կամ վարկանիշը չէ: Այս առումով իրավիճակը առանձնապես մեծ փոփոխությունների չէր էլ ենթարկվել: Խնդիրը վերաբերում է իշխանական համակարգին, հատկապես այսօր, երբ ընթանում են ակտիվ վերադիրքավորումներ:
Այստեղ է, որ Խաչատրյանները, այսպես ասած, էապես գցեցին Վովա Գասպարյանի արժեթղթերի «գինը», և քանի դեռ Խաչատրյանների արժեթղթերի «գինը» կմնա բարձր, ոստիկանապետին հազիվ թե հաջողվի փոխել իրավիճակը, եթե անգամ զուտ լիազորությունների մասով նա այլևս դրա վրա ազդելու բան չունի և հետագա զարգացումների պատասխանատուն այլ կառույցներ են:
