Մալաթիա-Սեբաստիա վարչական շրջանի ընդհանուր իրավասության դատարանում Ռոբերտ Պապոյանի վարույթում էր դիտավորյալ սպանության համար մեղադրված Ազատ Մ.-ի գործի քննությունը:
Պարզվել է, որ 69-ամյա Ազատը հանցավոր արարքը կատարել է անմեղսունակության վիճակում:
Նախաքննական մարմինը Ազատ Մ.-ին սկզբնապես մեղադրանք էր առաջադրել ՀՀ քրեական օրենսգրքի 104 հոդվածի 1-ին մասով այն բանի համար, որ նա 2014 թվականի հոկտեմբերի 27-ին, ժամը 17-ից 18-ն ընկած ժամանակահատվածում իրենց բնակարանում, գտնվելով ալկոհոլի ազդեցության տակ, իր կնոջը մեղադրել է այլ անձի հետ սեռական հարաբերություններ ունենալու համար, խանդի շարժառիթով դանակի բազմաթիվ հարվածներ է հասցրել և կյանքից զրկել է կնոջը:
Դատարանի՝ 2014 թվականի նոյեմբերի 17-ի որոշմամբ Ազատ Մ.-ն տեղավորվել է «Հոգեբուժական բժշկական կենտրոն» ՓԲԸ Նուբարաշենի ստացիոնար դատահոգեբուժական փորձաքննությունների բաժանմունքում՝ համալիր փորձաքննության ենթարկվելու համար:
Ապա, որպես անմեղսունակության վիճակում քրեական օրենսգրքով չթույլատրված արարք կատարած անձ՝ Ազատ Մ.-ն տեղավորվել է «Նուբարաշեն» հոգեբուժական կլինիկայի հատուկ հսկողության բաժանմունքում:
Ազատ Մ.-ն, ըստ գործի նյութերի, տառապել ու տառապում է օրգանական զառանցական՝ շիզոֆրենանման, խանգարում, ալկոհոլ հիվանդությամբ:
Նրանց ընտանիքի 35 տարվա հարևանուհու ցուցմունքով՝ տուժող կինը մշտապես դժգոհել է ամուսնուց, ասել է, թե Ազատի մոտ հոգեկան անհավասարակշռություն է նկատվում, նա «գժվել է»:
2014 թվականի հոկտեմբերի 27-ին հարևանուհին միջանցքից լսել է Ազատի որդու լացի ու բղավոցի ձայները: Անմիջապես գնացել է: Նրանց տղան միջանցքում լաց էր լինում: Ննջասենյակում ընկած էր Մարին (անունը փոխված է)՝ արնաշաղախ վիճակում:
Վկան հատակին տեսել է արյունոտ դանակը: Հարցրել է՝ ի՞նչ է եղել, Ազատի որդին լաց լինելով պատասխանել է, թե «գիժը» սպանել է մորը: Հարևանուհին ենթադրել է, որ «գիժ» ասելով՝ որդին նկատի ունի հորը…
Ազատի դստեր նախաքննական ցուցմունքով՝ հայրը հակում է ունեցել ալկոհոլի նկատմամբ: Պարբերաբար վիճել է մոր հետ, ծեծել է նրան: Մայրը 36 տարի համբերատար տարել է հոր վարքագիծը: Ինքը մորն առաջարկել է բաժանվել, ասել է, թե հնարավոր չէ այդպես ապրել, իսկ մայրն ասել է, թե նամուսի համար է դիմացել ու չի բաժանվել: Հայրը մոր հետ վիճում էր առանց որևէ պատճառի:
2013 թվականից մայրը աչքի հետ կապված՝ խնդիրներ է ունեցել, բուժումներ է ստացել Զեյթունի աչքի կլինիկայում: Այդ ժամանակից հայրը մորը մեղադրել է դավաճանության համար, ծեծել է նրան: Հայրը վեճերի ժամանակ բազմիցս ասել է, թե սպանելու է կնոջն ու գնա դատվի:
Հայրը մորը մեղադրում էր իրենց ընտանիքի բարեկամների, ծանոթների հետ իրեն դավաճանելու համար: Դա նրա հիվանդագին խանդի արդյունքն էր: Իր մայրը սուրբ անձնավորություն էր՝ նվիրված ընտանիքին ու երեխաներին:
Դեպքի օրն ինքը զբաղված է եղել երեխայի առողջական խնդիրներով, եղել է հիվանդանոցներում: Ժամը 15-16-ի սահմաններում զանգել է մորը, խոսել է նրա հետ առօրյա հարցերից: Մայրն ասել է, թե մեջքի շրջանում ցավեր ունի, լավ չի զգում: Այդ օրը քնելուց առաջ էլ է զանգել մորը, նրա հեռախոսն անջատված է եղել: Զանգել է իրենց տան հեռախոսին, եղբայրն ասել է, թե մայրը քնած է: Ինքը հաջորդ օրն է իմացել, որ մայրը մահացել է, բայց իրեն չեն ասել, թե հայրն է նրան սպանել: Դրա մասին իմացել է դեպքից տասն օր հետո…
Սպանված կնոջ քույրը հայտնել է, թե դեպքի օրը՝ ժամը 18-ի սահմաններում իրենց տուն է զանգել Ազատն ու ասել է. «Քեզ էլ, սաղիդ էլ սպանելու եմ»: Նա խոսել է արհամարհական ծիծաղով, ինքը սկզբում նույնիսկ չի ճանաչել, որ Ազատն է խոսողը, կարծել է, թե սխալ են զանգել: Հեռախոսն անջատել է: Անջատելուց հետո է հասկացել, որ Ազատի ձայնն էր, անմիջապես զանգել է քրոջը, ոչ ոք չի պատասխանել: Զանգել է քրոջ որդուն, պատասխանել է նրանց հարևանուհին ու ասել է, որ Ազատը Մարիին սպանել է:
Իր քույրը եղել է պարկեշտ, հոգատար, ընտանիքին նվիրված, սիրված ու հարգված կին…
Ազատի մոտ, բացի հոգեկան ու տարիքային հիվանդություններից, հայտնաբերվել է նաև սեռական թուլություն: Ըստ բժշկական եզրակացության՝ նա արարքը կատարել է զառանցական ապրումների ազդեցության տակ, ինչը նրան զրկել է իր գործողությունների վտանգավորությունը գիտակցելու, դրանք ղեկավարելու ընդունակությունից: Նրա վարքը պայմանավորված է եղել հոգեկան հիվանդագին խանգարմամբ: Ազատը ճանաչվել է անմեղսունակ:
Տուժողը մահացել է պարանոցի, կրծքավանդակի, ձախ ազդրի, գլխի շրջանի բազմաթիվ ծակած-կտրած վիրավորումներ ստանալու հետևանքով:
Դատարանը որոշել է Ազատ Մ.-ին ազատել քրեական պատասխանատվությունից, նրա նկատմամբ նշանակել բժշկական բնույթի հարկադրանքի միջոց՝ հոգեբուժական հիվանդանոցի հատուկ տիպի հոգեբուժական բաժանմունքում հարկադիր բուժում:
