«Նախագահ, վարչապետ, կառավարության բոլոր անդամներ, ոստիկանություն, ԱԺ, դուք նշանակված եք ժողովրդի շահերը պաշտպանելու համար, այլ ոչ թե ժողովրդին ծեծելու, թալանելու համար, կամ` որ մարդիկ տեղում մահանան սովից կամ դրսում` օտարի լծի տակ ապրելով, բավական է, որքան հանդուրժեցինք »,- «Առաջին լրատվական»-ի հետ զրույցում ասաց քաղաքացիական ակտիվիստ, «Ոչ թալանին» նախաձեռնության անդամ Վաղինակ Շուշանյանը՝ հավելելով, որ պարբերաբար այնպիսի օրենքներ են ընդունվում, որոնցով էլի ավելի են կեղեքում, թալանում մարդկանց:
Նա շեշտեց, որ թալանի վառ օրինակ է նաև այն, որ դարձյալ բարձրացնելու են էլեկտրաէներգիայի սակագինը` 6 դրամով:
Ըստ Վաղինակ Շուշանյանի՝ սակագնի բարձրացումը խորացնելու է մարդկանց սոցիալական խնդիրները, հանգեցնելու է արտագաղթի աճին, ինչպես նաև մարդիկ սկսելու են այլընտրանք փնտրել, բայց այն փայտի և գազի տեսքով է:
«Գազպրոմը» գազի սակագինը նվազեցրեց «Գազպրոմ Արմենիա»-ի համար: Երբ որ էժանանում է, նշանակում է սպառողների համար էլ պիտի էժանացվի, սակայն սպառողի համար չէժանացավ: Բացի այդ` մասնագետների պնդմամբ` եթե գազն էժանանում է, պետք է էլեկտրաէներգայի գինն էլ նվազի, քանի որ էլեկտրաէներգիա արտադրող ընկերությունները աշխատանքները կատարում են գազով, այնինչ` հակառակը` էլեկտրաէներգիան թանկացնում են»,-ասաց մեր զրուցակիցը:
Նա հիմնավոր չի համարում ՀԷՑ-ի պարտքերի պատճառով սակագինը բարձրացնելը, քանի որ սպառողները մեծ մասամբ պարտաճանաչ վճարել են: «Վերջին երկու տարվա ընթացքում էլեկտրաէներգիայի գինը մոտ 50 տոկոսով թանկացել է, անցած երկու տարվա մեջ 40 տոկոսով թանկացավ` 30 դրամից դարձավ 42 դրամ, այսօր արդեն, իմ տեղեկություններով, ՀԷՑ-ը պիտի դիմեր Հանրային ծառայությունները կարգավորող հանձնաժողովին՝ հոսանքը ևս 6 դրամով թանկացնելու համար՝ պատճառաբանելով, որ գոյացել են պարտքեր՝ 250 մլն դրամի չափով: Ինչո՞ւ պիտի հայ սպառողը փակի ռուսական ընկերության պարտքերը, կամ այդ պարտքերն ինչպե՞ս են կուտակվել»,- նշեց Շուշանյանը:
Քաղաքացիական ակտիվիստի հավաստմամբ՝ չեն թողնի, որպեսզի թանկացումը մարսեն, կրկին մի շարք միջոցառումներ են իրականացնելու, քանի որ իշխանությունների պահվածքը զավեշտի է վերածվում. ամռանը տեսան, թե թանկացման դեմ ինչպես էին պայքարում, հիմա դարձյալ թանկացնում են: Վաղինակ Շուշանյանի խոսքերով` ճնշումները, ոստիկանական ծեծը չեն կարող հանգեցնել պայքարի կասեցմանը. անցած տարի 28 հոգի բերման ենթարկվեցին, մի մասի նկատմամբ հարուցվեցին վարչական գործեր, մեկի նկատմամբ` նույնիսկ քրեական գործ, փորձում են ծեծելով լռեցնել:
Մանրամասները՝ տեսանյութում
