«Առաջին լրատվական»-ի տեղեկություններով՝ վաղը Արցախում նշվող եռատոնին կմասնակցի նաև նախկին նախագահ Ռոբերտ Քոչարյանը:
Այս տարի նրա մասնակցությունն ուշագրավ է, քանի որ Քոչարյանն առնվազն նախորդ երկու տարիներին Արցախում այդ տոնակատարությանը մասնակցելու ցանկություն չի ունեցել՝ հավանաբար այն պատճառով, որ 2 տարի անընդմեջ այնտեղ է եղել նաև Սերժ Սարգսյանը:
Արցախում թերևս կկայանա Հովիկ Աբրահամյանի հետ «պատահական» հերթական հանդիպումը, որի առիթն էլ հենց եռատոնն է:
Հիշեցնենք, որ Աբրահամյանի և Քոչարյանի միջև նման պատահական հանդիպումներ հաճախ են ստացվում: Օրինակ՝ 2012-ին, երբ Հովիկ Աբրահամյանն Ազգային ժողովի նախագահ էր, Ռոբերտ Քոչարյանին պատահաբար հանդիպել էր Չեխիայից վերադառնալիս՝ ինքնաթիռի սրահում, դրանից երկու տարի անց, երբ նոր էր նշանակվել վարչապետ, կրկին շատ պատահական հանդիպել էին Մոսկվայում:
Նման պատահականություններից կարելի է եզրակացնել, որ նրանց ոչ պատահական հանդիպումների գլխավոր խոչընդոտը միայն Սերժ Սարգսյանն է:
