Թուրքական Sabah թերթի փոխանցմամբ, այսօր Ստամբուլի «Բահչեշեհիր» համալսարանում բացվել է «Արևմտականացած Ստամբուլի հայ ճարտարապետները» խորագրով ցուցահանդեսը: Այն կազմակերպել են «Հրանտ Դինք» հիմնադրամը և «Հայջար» կազմակերպությունը:
Ցուցահանդեսում ներկայացվել են մինչև 20-րդ դարի սկիզբը (Հայոց ցեղասպանություն) Ստամբուլում բնակված և ստեղծագործած մոտ 40 հայ ճարտարապետների ստեղծագործությունների լուսանկարները:
Հիշեցնենք, որ այս տարվա հունվարի կեսերին թուրք լրագրող Ջենգիզ Չանդարն իր «Եթե հայերը չլինեին, Ստամբուլն արդյոք կլինե՞ր» հոդվածում գրել էր, որ հայերը մեծագույն ավանդ են ունեցել Ստամբուլի և ընդհանրապես Թուրքիայի կյանքում.
«Մենք բոլորս պետք է մտածենք, թե ինչպես 1915 թվականից հետո մեր երկիրն սկսեց անապատանալ: Բոլոր սպանությունները, կոչվի դա «ցեղասպանություն», «զուլում» կամ «պատմության կեղծիք», անդառնալի հարված էին մեր երկրին և խոր մտածելու առիթ են տալիս»:
