2008թ. դեկտեմբերին Բաղդադում մամլո ասուլիսի ժամանակ ԱՄՆ նախագահ Ջորջ Բուշ-կրտսերի վրա կոշիկ էին նետել: Արաբական մշակույթում ինչ-որ մեկի վրա կոշիկը նետելը հավասարազոր է լրջագույն վիրավորանքի: Բուշ-կրտսերի վրա կոշիկ նետած իրաքցի լրագրող Մունթազար ազ-Զեյդին RT-ին տված հարցազրույցում բացատրել է իր արարքի դրդապատճառները:
«Ջորջ Բուշը խաբեց, երբ հայտարարեց, որ Իրաքի բնակիչներն իրեն վարդերով են ընդունել: Պատճառը նաև ավելի քան 1.5 մլն սպանված իրաքցիներն են, ավելի քան 5 մլն փախստականները, ինչպես նաև ավելի քան 5 մլն անտուն որբ երեխաներն ու ավելի քան 5 մլն այրիացած կանայք: Դրան ավելացրեք իրաքյան բնական ռեսուրսների թալանը, երկրի ավերումն ու պառակտումը»,- ասել է ազ-Զեյդին:
Նա նշել է, որ այդ ակցիան նախօրոք է ծրագրված եղել: Նա չի թաքցրել նաև, որ այդ ակցիայից հետո վախեցել է իր կյանքի համար և նույնիսկ հրաժեշտի տեսագրություն թողել:
Նա պատմել է, որ իշխանություններն իր հետ շատ դաժանաբար են վարվել՝ ծեծել են, այդ թվում՝ մտրակներով, քաշել են ատամները, կոտրել քիթն ու ոտքը: Բացի դրանից՝ էլեկտրաշոկեր են կիրառել և ամենատարբեր միջոցներով կտտանքների ենթարկել: Իսկ ահա շարքային իրաքցիները, ընդհակառակը, մեծապես աջակցել են և ամեն կերպ փառաբանել ազ-Զեյդիին: Բայց լրագրողը նշել է, որ իրեն հերոս չի համարում:
«Ինչպես ես արդեն ասել եմ՝ ես հերոս չեմ: Բայց իսկապես արտահայտում եմ ամբողջ իրաքցի ժողովրդի տրամադրությունները: Տարբեր ծագման և հավատքի իրաքցիներ դուրս էին եկել փողոցներ՝ ցույց տալու իրենց համերաշխությունն ինձ: Նրանք ողջունում էին իմ արարքը, քանի որ այն արտահայտում է իրաքցիների կամքը, ոչ թե մեկ այլ պետության կամ ընդհանրապես այլ մոլորակի կամքը: Ես Իրաքի քաղաքացի եմ, և ցույցերը հաստատեցին, որ իմ հայրենակիցները կդիմակայեն ամերիկյան օկուպացիային»,- ասել է ազ-Զեյդին:
