Այսօր ԱՄՆ ՄԶԳ-ն պաշտոնապես մեկնարկեց Հարկային բարեփոխումների նոր քառամյա ծրագիրը, որի նպատակն է նպաստել Հայաստանի հարկային միջավայրի բարելավմանը: ԱՄՆ ՄԶԳ հայաստանյան գրասենյակի տնօրեն Քարեն Հիլիարդը ողջունեց ծրագրի մեկնարկը և նշեց, որ ավելի քան տասը տարի ԱՄՆ ՄԶԳ-ն աջակցում է ՀՀ-ում հարկային բարեփոխումներին:
«Նոր ծրագիրը աջակցելու է ՀՀ կառավարությանը՝ զարգացնելու ավելի արդյունավետ հարկային համակարգ և հեշտացնելու հարկերի վճարումը բիզնեսի համար: Մենք գիտենք, որ հարկային և ֆիսկալ բարեփոխումները դժվար են, և այդ պատճառով, եթե ՀՀ կառավարությունը դրսևորի քաղաքական կամք, մենք կաջակցենք նրանց»,- հայտարարեց Ք. Հիլիարդը:
ՊԵԿ նախագահ Գագիկ Խաչատրյանի գնահատմամբ՝ հարկային վերջին բարեփոխումները «հիմքեր են ստեղծել զարգացման նոր փուլի անցնելու»: Ըստ նրա՝ Համաշխարհային բանկը կֆինանսավորի հարկային համակարգի հետագա զարգացումը երեք ուղղությամբ. տեղեկատվական ենթակառուցվածի զարգացում՝ հարկատու 3 համակարգի կատարելագործում, սպասարկման համակարգի և վերահսկողության կատարելագործում, ինստիտուցիոնալ զարգացում և հարկային տեսչությունների օպտիմալացում, կնվազի նաև հարկ վճարողների միջև շփումը:
Գ. Խաչատրյանը նշեց, որ ԱՄՆ «Դելոյդ» ընկերությունը ապահովելու է ծրագրի տեխնիկական կողմը և տրամադրելու է աջակցություն:
ՀՀ ֆինանսների փոխնախարար Սուրեն Կարայանի խոսքով՝ ծրագրի իրականացման արդյունքում տնտեսվարողների համար նպաստավոր հարկային միջավայր կապահովվի. «Ծրագրի հաջող իրականացումը կարևոր ներդրում կլինի համակարգի արդյունավետության բարձրացման և գործարար միջավայրի բարելավման առումով»: Նա ծրագիրը բնորոշեց որպես «հավակնոտ, իրատեսական և խիստ անհրաժեշտ երկրի համար»:
ՀԲ հայաստանյան գրասենյակի ղեկավար Ժան Միշել Հապպին հույս հայտնեց, որ ծրագիրը կավելացնի հարկային կարգապահությունը և կնվազեցնի հարկերից խուսափելու դեպքերը, և տնտեսությունում առկա չիրացված մեծ ներուժը կիրացվի: Նա ֆինանսների նախարարության և ՊԵԿ ղեկավարություններին կոչ արեց նոր թափ հաղորդել դոնորների համակարգմանը, որպեսզի կարողանան շարունակել համակարգված գործընթացով բարեփոխումների իրականացմանը:
Լուսանկարը՝ PanARMENIAN Photo-ի
