Վերաքննիչ քրեական դատարանը մերժել է «Վելես» հասարակական կազմակերպության նախագահ Մարինա Պողոսյանի բողոքը: Վերջինս բողոքարկում էր Ընդհանուր իրավասության դատարանի կայացրած որոշումը, որով մերժվել էր իրավապաշտպանի բողոքը: Մարինա Պողոսյանը 2014թ. մարտի 17-ին բռնության էր ենթարկվել Դատական ակտերի հարկադիր կատարման ծառայության աշխատակիցների կողմից, դեպքի առթիվ Հատուկ քննչական ծառայությունում հարուցվել էր քրեական գործ, որը հետագայում կարճվել էր: «Վելես» հասարակական կազմակերպության նախագահը բողոքարկում է կարճման որոշումը, սակայն դատական երկու ատյաններն էլ մերժել են նրա բողոքը:
«Մեզ համար անակնկալ չէր նման որոշումը, հատկապես հաշվի առնելով առաջին ատյանի դատավոր Լևոն Ավետիսյանի դիրքորոշումը այս գործի նկատմամբ և այն հանգամանքը, որ Վերաքննիչ դատարանի դատավոր Ռուզաննա Բարսեղյանն ու դատավոր Լևոն Ավետիսյանը նախկինում միասին աշխատել են նույն մարզում: Հասկանալի է, որ Բարսեղյանը պետք է կոծկեր Ավետիսյանի կողմից ապօրինի կայացված դատական ակտը»,- «Առաջին լրատվական»-ի հետ զրույցում ասաց Մարինա Պողոսյանը:
Նրա խոսքով՝ վերոնշյալ երկյակը բացարձակ անհաղորդ է մնացել այն փաստի նկատմամբ, որ Դատական ակտերի հարկադիր կատարման ծառայակիցները բռնություն են կիրառել ինչպես իր, այնպես էլ 75-ամյա կնոջ նկատմամբ:
«Նրանց համար միևնույն է, թե ինչ է կատարվում Հայաստանում, թե ինչպես են ոտնահարվում մարդու իրավունքները, ինչպես են ստորացվում ՀՀ քաղաքացիները. նրանք միայն իրենց պատվիրատուի շահերն են պաշտպանում: Դատավորները պարզապես թքած ունեն Հայաստանի Սահմանադրության և մյուս օրենքների վրա: Դե յուրե դատավորները անկախ են, սակայն դե ֆակտո նրանք հաճախ ստանձնում են հանցագործների պաշտպանի դերը՝ ելնելով իրենց նեղ անձնական շահերից: Փաստորեն, դատավորներն էլ օրենքով պաշտպանված հանցագործներ են»,- նշում է «Վելես» ՀԿ-ի նախագահը:
Մարինա Պողոսյանին զարմացրել է հատկապես այն, որ դատավոր Ռուզաննա Բարսեղյանը փորձել է պարզել, թե որքան ժամանակով են ԴԱՀԿ ծառայակիցները փակի տակ պահել իրավապաշտպանին: «Քննիչն ու դատախազը միաձայն պնդում էին, թե իբր ինձ ընդամենը մի քանի վայրկյան են փակի տակ պահել, և դա փաստորեն հիմք տվեց դատավորին որոշելու համար, որ իմ նկատմամբ կիրառված ուժն ու ազատության սահմանափակումը իրավաչափ են եղել: Հետաքրքիր է, թե ո՞ր օրենքում է դատավորը կարդացել, որ անձին առանց դատարանի որոշման ազատությունից զրկելը՝ թեկուզ կարճ ժամանակով, իրավաչափ է»,- հռետորական հարց է հնչեցնում Մարինա Պողոսյանը:
Իրավապաշտպանը շեշտում է, որ երկու դատարաններում էլ ինքը հաղորդում է տվել հանցագործության մասին, սակայն դատավորները կրկին անհաղորդ են մնացել: «Ես շատ հստակ հայտարարել եմ, որ սույն քրեական գործից կորել են ցուցմունքներ, սակայն այս տխրահռչակ երկյակին դա բնականաբար չի հետաքրքրել: Ընդհանրապես, ես այն տպավորությունն ունեի, որ թե՛ դատավոր Ավետիսյանը, թե՛ Բարսեղյանը նիստի հենց սկզբում իրենց որոշումներն արդեն գրել-բերել էին, այդ պատճառով էլ գործը պարզապես չքննեցին»,- ասում է «Վելես» ՀԿ-ի նախագահը:
Մարինա Պողոսյանը կարծում է, որ նման դատական ակտերը ապտակ են ՀՀ հեղինակությանը և մեր երկիրը հավասարեցնում են Ադրբեջանի մակարդակին: «Մենք Ադրբեջանին քննադատելու տեղ չունենք, քանի որ մեր երկրում իրավապաշտպանների նկատմամբ նույն վերաբերմունքն են դրսևորում, ինչ հարևան երկրում: Սրանք ադրբեջանցիներից ոչնչով չեն տարբերվում»:
Ներկայումս «Վելես» ՀԿ-ն դիմել է ՀՀ գլխավոր դատախազություն՝ ներկայացնելով հաղորդում ՀՔԾ քննիչի կողմից սույն քրեական գործով կատարված հանցագործության մասին. «Եթե Հայաստանի դատարաններն այս որակի են, դատախազությունից ևս մեծ ակնկալիքներ չունենք, սակայն մենք մեր պարտքն ենք համարում բարձրաձայնել իրավապահ համակարգում տիրող ապօրինությունների մասին»,- ասում է Մարինա Պողոսյանը:
