Թուրք սյունակագիր Դողան Հեփերը «Միլիյեթ» պարբերականում լույս տեսած իր «Կրկին հայերը» հոդվածում անդրադարձել է Հայոց ցեղասպանության 100-րդ տարելիցի միջոցառումներին, Ստամբուլի հայկական եկեղեցում մատուցված ապրիլքսանչորսյան պատարագին և դրանց թուրք նախարարի մասնակցությանը:
Վերջինիս կարծիքով՝ «Թուրքիան արել է առավելագույնը, իսկ հայերի՝ Թուրքիայի դեմ քայլերը հենց հայերին են վնասում»:
«Թուրքիայում առաջին անգամ 100-րդ տարելիցին հարգեցին 1915-ին կյանքից հեռացած հայերի հիշատակը: Այս նպատակով Գումգափուի հայկական եկեղեցում պատարագ մատուցվեց: Թուրքական պետության պատմության մեջ առաջին անգամ էլ այդ արարողությանը թուրք նախարար մասնակցեց: Եվ պատարագին մասնակցած նախարար Վոլքան Բոզքըրը հետևյալն ասաց. «Մենք հայ եղբայրների ապրած ցավը հարգում ենք: Տեղի ունեցածը շատ վատ դեպք ենք համարում»: Սրանից ավելի ի՞նչ ասեր»,-գրում է թուրք հեղինակը՝ համարելով, որ թուրք նախարարի մասնակցությունը պատարագին ու ասված այս խոսքերն առավելագույնն են, ինչ Թուրքիան պետք է աներ:
Այնուհետև, հեղինակն անդրադառնում է Երևանում Ցեղասպանության 100-ամյակի միջոցառումներին՝ դրանք փորձելով համեմատել Դարդանելի ճակատամարտի 100-ամյակի միջոցառումների հետ: Նա նշում է, որ թեև Թուրքիա է ժամանել 17 պետության ղեկավար, սակայն Հայաստան են այցելել Ռուսաստանի նախագահ Վլադիմիր Պուտինն ու Ֆրանսիայի նախագահ Ֆրանսուա Օլանդը: Ըստ հեղինակի՝ Օլանդը այն առաջնորդներից է, որի հետ լավ հարաբերություններ ունի նախագահ Էրդողանը:
Վերջինս նշում է, թե Ֆրանսիան և ՌԴ-ն որ ցանկանային` կարող էին ավելի խորացնել Հայաստանի և Թուրքիայի միջև խնդիրները, սակայն հեռու են մնում: «Սակայն աշխարհի մի շարք երկրներ փորձում են խորացնել տարաձայնությունները: Ծառայություններ են մատուցում հայկական սփյուռքին: Չգիտեն, որ այդ կերպ ավելի վնասում են հայերին: Քանի որ այս բոլոր տարաձայնությունների պատճառով Հայաստանի հայերն են վնասներ կրում: Արդյոք անցյալը պատմությանը թողնելն ու մաքուր էջից սկսելը Թուրքիայից շատ Հայաստանին պետք չէ՞»,-նշում է հեղինակը՝ պաշտպանելով թուրքական այն տարածված տեսակետը, թե «Թուրքիայի և Հայաստանի միջև հարաբերություններին խանգարում է հայկական սփյուռքը»:
Վերջում Դողան Հեփերը հայտարարում է, որ «Թուրքիան իր դիրքերում ամուր է կանգնած»:
Նշենք, որ վերջին շրջանում «Միլիյեթ» պարբերականում զգալի ակտիվացել են անդրադարձերը հայկական թեմաներին: Թուրքական հեղինակավոր թերթում կարելի է հանդիպել ինչպես Ցեղասպանությունը ժխտող, այնպես էլ ճանաչող կարծիքներ:
