Թուրքիայի 11-րդ նախագահ Աբդուլլահ Գյուլը Ադրբեջանում հակահայ ելույթ է ունեցել Արցախի հակամարտության վերաբերյալ, որի համար պարգևատրվել է՝ ստանալով Ադրբեջանի դիվանագիտական ակադեմիայի պատվավոր դոկտորի կոչում։ Այս մասին հայտնում է թուրքական «Անադոլու» լրատվական գործակալությունը։
«Հայերը շարունակում են Լեռնային Ղարաբաղի բռնազավթումն ամբողջ աշխարհի աչքի առաջ։ Մինչդեռ աշխարհի տկար արձագանքը հայերին թույլ է տալիս շարունակել իրենց վերահսկողությունը ադրբեջանական տարածքներում», – հայտարարել է Գյուլը։
Նշենք, որ Թուրքիայի պետական TRT հեռուստառադիոընկերության՝ TRT AVAZ միջազգային հեռուստաալիքը Արցախի վերաբերյալ հակահայ բովանդակությամբ մի քանի սերիանոց փաստավավերագրական ֆիլմ է նկարահանել, որը ցուցադրվում է մի քանի երկրներում, այդ թվում նաև Ադրբեջանում։
Հեռուստատեսության տարածած հայտարարության մեջ ասվում է. «Ղարաբաղում հայկական բռնազավթումը, ինչպես նաև ադրբեջանցի թուրքերի նկատմամբ իրականացված կոտորածն աշխարհին ցույց տալու համար պատրաստել ենք «Ղարաբաղի լուռ ճիչը» ֆիլմը»։
