Գիտնականները ստեղծել են տեսախցիկ, որը վայրկյանում կարող է նկարել 1 տրլն կադր: STAMP – Sequentially Timed All-optical Mapping Photography անվամբ սարքը կարող է հետազոտողներին բարձր արագությամբ տեղի ունեցող տարբեր պրոցեսների նկարահանման գործում նշանակալի օգնություն ցուցաբերել, հայտնում է gazeta.ru-ն: Տեսախցիկի աշխատանքի սկզբունքը հիմնված է լույսի դիսպերսիայի, այսինքն՝ լուսային ճառագայթի գունային սպեկտրի տրոհման վրա: Գյուտի ավելի մանրամասն նկարագրությանը կարելի է ծանոթանալ Nature Photonics ամսագրում:
Տեսախցիկի առաջին տարբերակը ստեղծվել է անցյալ տարվա օգոստոսին: Այդ ժամանակ սարքավորումը կարող էր միաժամանակ անել ընդամենը 6 լուսանկար, այժմ դրանց թիվը հասել է մինչև 25-ի: Սակայն գիտնականները համոզված են, որ դա սահմանը չէ. նրանք պատրաստվում են շարունակել աշխատանքը տեսախցիկի կատարելագործման ուղղությամբ և միաժամանակ ստացվող պատկերների քանակը հասցնել մինչև 100-ի:
