Եգիպտոսի քաղաքային համայնքների ասոցիացիան որոշում է կայացրել դադարեցնել ալկոհոլային խմիչքների վաճառքի համար արտոնագրերի տրամադրումը երկրի բոլոր բնակավայրերին, բացառությամբ՝ Կահիրեի, Ալեքսանդրիայի և մի քանի խոշոր եգիպտական քաղաքների: Ինչպես հաղորդում է RIA Novosti-ն, այս մասին հայտարարել է ասոցիացիայի նախագահի տեղակալ Նաբիլ Աբբասը:
Աբբասն ընդգծել է, որ առևտրային ձեռնարկությունների կողմից ավելի վաղ ձեռք բերված արտոնագրերն ուժի մեջ են մինչև դրանց գործողության ժամկետի ավարտը:
Նա նշել է, որ նման որոշում է կայացվել տեղի համայնքների խնդրանքով, քանի որ ալկոհոլի վաճառքը դառնում է հասարակական կարգի խախտման պատճառ, մասնավորապես, կանանց հանդեպ անհարգալից վերաբերմունքի, մանր խուլիգանությունների, ճանապարհային կանոնների խախտման, անվտանգության ոլորտի ընդհանուր բարդացման:
Եգիպտացի փորձագետների կարծիքով՝ ալկոհոլային խմիչքների վաճառքի համար արտոնագրեր տրամադրելու դադարեցումը բացասական ազդեցություն կունենա ոչ միայն ներքին սպառողական շուկայի, այլ նաև Եգիպտոսի բյուջեի հիմնական եկամուտներից մեկի՝ զբոսաշրջության վրա: Եգիպտոսի զբոսաշրջային ընկերությունների ասոցիացիան կարծում է, որ այս որոշումը հավելյալ հարված կհասցնի երկրի հեղինակությանը և գրավչությանը արտասահմանցի զբոսաշրջիկների համար, որոնց թիվը վերջին ժամանակներս կրճատվում է Եգիպտոսում տիրող անկայուն հասրակական և քաղաքական իրավիճակի պատճառով:
