Գյումրու քաղաքապետ Սամվել Բալասանյանն այսօր ընտրել է Գյումրու Գեղարվեստի ուսումնարանում տեղակայված ընտրատեղամասում: Առաջին բանը, որ նա հայտարարել է, այն է, որ Գյումրիում ընտրությունները ակտիվ են անցնելու, քաղաքացիները ակտիվ են, ինչը Սամվել Բալասանյանը պայմանավորել է ջերմաստիճանի բարձրացմամբ: Նա հայտարարել է. «Այնպիսի ընտրություն ենք անցկացնելու, որ միջազգային կառույցներին դուր գա»: Ապա հորդորել է լրագրողներին` ուշադիր լինել, որպեսզի խախտումներ չարձանագրվեն, իսկ արձանագրելու դեպքում շտապ տեղյակ պահեն Սամվել Բալասանյանին, քանի որ նա է Գյումրու բոլոր տեղամասերում ընտրությունների պատասխանատուն:
Ներկայացնում ենք ԳԱԼԱ-ի հետ Սամվել Բալասանյանի հարցազրույցն ամբողջությամբ:
-Պարո՛ն Բալասանյան, ո՞րն է Ձեր գնահատականը ընտրություններին:
-Ակտիվություն կա, երբեք այդ ժամին այսքան ակտիվություն չէր եղել: Նաև տեղեկություն ունեմ մյուս ընտրատեղամասերից, որ լուրջ ակտիվություն կա, ոնց որ թե ջերմաստիճանը բարձրանում է գյումրեցիների ակտիվությունն էլ ավելանում է: Ես գիտեմ, որ լուրջ ակտիվություն է լինելու, շատ լավ մասնակցելու են գյումրեցիները այս ընտրություններին:
-Ուրիշ հանգամանքով չե՞ք պայմանավորում. Օրինակ, ամենուրեք խոսում են, որ Գյումրիում ընտրակաշառք են բաժանում: Դա կարո՞ղ է նպաստել, որ ընտրողները ավելի ակտիվանան:
– Գիտեք՝ շատ կարևոր ընտրություն ենք համարում ՀՀ նախագահի ընտրությունները, և դրա համար գյումրեցիների ակտիվությունը բարձր է: Դա բերելու է հետագայում նաև այն կարևորագույն խնդիրներին, որ մենք վստահում ենք, այսինքն վերջում, երբ որ բացվեց և մենք տեսանք, որ վստահել ենք համապատասխան կամ, ասենք, որևէ թեկնածուի, բնականաբար նաև մենք մեր պահանջն ենք դնում, որ մենք վստահեցինք և պետք է, որ գործ կատարվի մեզ համար:
Կարևորը, որ ազնիվ, արդար, թափանցիկ ընտրություններ լինեն: Լուրջ ուշադրություն կա այսօր Գյումրի քաղաքի վրա: Կան շատ դիտորդներ: Նաև լրատվամիջոցները, ուշադիր եղեք, որ որևէ խախտում չլինի Գյումրիում:
-Պարո՛ն Բալասանյան, Դուք տեղյա՞կ եք այն հրապարակումներին, որ պատմում են ընտրակաշառքի մասին, ի՞նչ կասեք: Նաև ունենք ահազանգեր, որ Ձեր ազգականների անուններն են շրջանառվում:
-Եթե այդպիսի փաստեր կան, կարող եք ներկայացնել, մենք կդատապարտենք այդ մարդկանց, եթե այդպիսի քայլի են գնում՝ կապ չունի ում ազգականն է: ԳԱԼԱ հեռուստաընկերությունը լուրջ ակտիվություն ցուցաբերեց և պետք է, որ ունենանք այնպիսի ընտրություններ, ինչպիսին մեզ պետք է: Որպեսզի մենք կարողանանք նաև առաջընթաց արձանագրենք, որ բոլոր միջազգային կառույցները լավ գնահատականներ տան: Այսօր, ոնց որ թե, դիտորդների կողմից մի բառ օգտագործվեց. ասում են՝ տխուր ընտրություններ են, ասի՝ տխուր չէ, հանգիստ ընտրություն է, բառը ճիշտ չեն օգտագործում: Ինձ թվում է՝ լավ է լինելու: Այնպես որ, դուք հետևեք որպես լրատվամիջոց, որ ոչ մի բան չլինի, եթե լինի, ահազանգեք անմիջապես՝ թեկուզ ինձ:
Ես ընդհանուր պատասխանատու եմ՝ որպես քաղաքապետ, նորմալ ընտրություններ կազմակերպելու համար: Սա իմ պարտավորությունների մեջ է մտնում: Ես փորձում եմ անել ամեն ինչ այսօր մինչև ընտրական պրոցեսների վերջ:
