Երեխաների սեռական շահագործումը զբոսաշրջության ոլորտին գրեթե 20 միլիարդ դոլար է բերում: Սեքս-զբոսաշրջությունը երեխաների մասնակցությամբ առավել տարածված է զարգացող երկրներում: Այս մասին տեղեկացրել է ՄԱԿ-ի հատուկ զեկուցող Նաժատ Մաալի-Մժիդը:
Այս խայտառակ երևույթին, սակայն, կարելի է բախվել երկրագնդի ցանկացած մասում: Դրանից ապահովագրված չէ և ոչ մի պետություն, ոչ մի զբոսաշրջային ուղղություն:
Զեկույցի հեղինակը ուշադրություն է հրավիրում խնդրի այն կողմին, որ երեխաներ որսացող սեքս-զբոսաշրջիկները հիմնականում Եվրոպայի, Հյուսիսային Ամերիկայի, Ռուսաստանի Դաշնության, Ճապոնիայի և Նոր Զելանդիայի հարուստ քաղաքացիներն են:
Օրինակ՝ Թաիլանդում սեքս-տուրիզմի համար պատասխանատվության ենթարկված մարդկանց մեծամասնությունը ավստրալացիներ են:
Սեքս-զբոսաշրջիկներին գրավում են առավելապես այն վայրերը, որտեղ մտադրությունները կասկածներ չեն առաջացնում, իսկ գործողություններն ուշադրություն չեն գրավում:
Տուրիստական ուղղությունը կախված է այդ մարդկանց լեզվից և կապերից, ինչպես նաև նախասիրություններից ու ճաշակից:
Զեկույցում նշվում է, որ ամեն տարի սեռական շահագործման է ենթարկվում 2 միլիոն երեխա: Երեխաների իրավունքներին առնչվող սեքս-զբոսաշրջության իրական ծավալները, սակայն, հայտնի չեն:
