Խոսելով «Ժառանգության» փոխնախագահ Ռուբեն Հակոբյանի կողմից Հայ ազգային կոնգրեսի և Լևոն Տեր-Պետրոսյանի հասցեին հնչեցված գնահատականներից՝ «Ժառանգության» ԱԺ խմբակցության ղեկավար Ստյոպա Սաֆարյանը ասաց, որ այդ առնչությամբ կուսակցության պաշտոնական տեսակետին և ընդդիմադիր դաշտում համագործակցության եզրեր գտնելու բանակցությունների արդյունքներին առաջիկայում կծանոթացնի կուսակցության վարչության նախագահ Րաֆֆի Հովհաննիսյանը:
Ինքն այս պահին ավելին ոչինչ չի կարող ասել, սակայն արձանագրեց, որ այն, ինչ ներկայումս տեղի է ունենում «Ժառանգության» և Հայ ազգային կոնգրեսի միջև, շատ վատ է, և երկու կողմն էլ պետք է կանգ առնեն: Ս. Սաֆարյանի կարծիքով, ընդդիմադիր ուժերի միջև նման լարվածություն կարող է լինել, բայց երբ այդ ամենը երկար է տևում՝ լավ չէ:
Միաժամանակ նա նկատեց, որ, հաշվի առնելով Լևոն Տեր-Պետրոսյանի ապրիլի 8-ի հանրահավաքի ելույթը, չի հավատում, թե այս լարվածությանը վերջ կտրվի, և առաջին հերթին՝ Հայ ազգային կոնգրեսի կողմից: Բայց դրանից ո՛չ ընդդիմադիր դաշտն է շահում, ո՛չ էլ հասարակությունը:
«Լևոն Տեր-Պետրոսյանի որդեգրած քաղաքականությունն ասում է, որ Հայ ազգային կոնգրեսից դուրս բոլոր քաղաքական ուժերը խանգարում են ՀԱԿ-ի գործունեությանը: Փորձ է արվում քաղաքական դաշտում խաղի նոր կանոն ներդնել: Այսինքն՝ եթե ՀԱԿ-ին զուգահեռ այլ քաղաքական ուժեր էլ գործեն, ուրեմն, դրանք են մեղավոր, որ Կոնգրեսը հաջողությունների չի հասնում: Ըստ էության, Լևոն Տեր-Պետորսյանը հայտնվել է դաշտի կենտրոնում՝ շրջապատված ավելի շատ թշնամիներով, քան համակիրներով: Իսկ նման պայմաններում, երբ քար են շպրտում, կենտրոնում գտնվելով՝ դու ինքդ ես հարվածները վերցնում»,- նշեց Ս. Սաֆարյանը:
«Ժառանգության» խմբակցության ղեկավարը նաև ասաց, որ երկար ժամանակ փորձել է հասկանլ, թե ինչ է նշանակում այն թատերական ներկայացումը, երբ բոլորին պարզ է, որ առանց խոչընդոտների ընդդիմությունը մտնելու է Ազատության հրապարակ, բայց կազմ ու պատրաստ ոստիկաններ են կանգնած, և հանգել է այն եզրակացության, որ դա նշանկում է, թե կարող են մտնել, բայց այնտեղ երկար մնալ չեն կարող:
