Ռիչարդ Նիքսոնը ոչ պաշտոնապես խորհուրդներ է տվել նախագահ Բիլ Քլինթոնին և նույնիսկ նրա միջոցով նամակներ է փոխանցել Ռուսաստանի նախագահ Բորիս Ելցինին ու այլ պաշտոնատար անձանց։ Այս մասին, ըստ Associated Press գործակալության, հայտնում է The Washington Post-ը։
Գործակալությունը հղում է անում վերջերս գաղտնազերծված փաստաթղթերին, որոնք այսօրվանից կարելի է տեսնել Կալիֆոռնիայի Nixon Presidential Library ցուցահանդեսում:
Քլինթոնը բազմիցս ասել է, որ շնորհակալ է Նիքսոնին խորհուրդների համար, հատկապես՝ Ռուսաստանի հետ հարաբերություններին վերաբերող։ Խոսքն այն ժամանակների մասին է, երբ «աշխարհը դառնում էր ավելի փոխկախված, բայց դրա հետ մեկտեղ՝ անկառավարելի»: Քլինթոնը խոստովանել է, որ այդ դժվար տարիներին օրինակ է վերցրել Նիքսոնից, ով կարծում էր, որ Ամերիկան չպետք է առանձնանա գլոբալ քաղաքականությունից, այլ պետք է «առաջվա պես ձեռք մեկնի հին ընկերներին, նաև՝ հին թշնամիներին»:
Ցուցահանդեսում ցուցադրվում է Քլինթոնի ամենամոտ խորհրդատուներից մեկի՝ Նիկոլաս Բյորնսի զեկույցը, ով 1994-ին Ռուսաստան իր վերջին այցից առաջ3 ժամ զրուցել է Նիքսոնի հետ:
Զեկույցի համաձայն՝ Նիքսոնն ասել է, որ Սպիտակ տունը բավական խիստ չի արտահայտվում Ռուսաստանի և նրա հարևանների հարաբերությունների մասին: «Նիքսոնը նաև Ռուսաստանին խորհուրդ էր տալիս ամերիկյան օգնությունը կապել ԱՄՆ անվտանգության հետ»,- ասված է հոդվածում:
Պարբերականը նկարագրում է Նիքսոնի այցը Ռուսաստան. «Ելցինը «ապշեցրել է» նախկին նախագահին՝ նրան Կրեմլ չթողնելով։ Ելցինի հակառակորդների հետ Նիքսոնի հանդիպումներից հետո Ռուսաստանի նախագահը հետ է վերցրել կառավարական թիկնապահներին և լիմուզինը»: Ճիշտ է՝ ավելի ուշ Ելցինը քաղաքական գործիչներին և խորհրդականներին կոչ է արել հանդիպել Նիքսոնի հետ:
